Shillong, Naiwieng 29
Ka lympung ïalehkai First Division Football Tournament 2024 ba la pynïaid da ka Tyrsad Area Sports Association (TASA) ka la nangjam shaphrang ha kaba Wahlyngkien Sunei SC ka la ïoh jingjop, katba ka Mawponghong SC bad ka Pomsanngut SC ki la ïasam mar shi point.
Ha kane ka jingïakhun kaba la long ha ka Sngi Palei ha madan Tyrsad, ka Wahlyngkien Sunei ka la pynliem noh ïa ka Umkaber SC da 2-0 kol. Ha kane ka jingïalehkai ka Wahlyngkien ka la ïoh ban pynkhih jar nyngkong eh lyngba u Rosstar Thabah ha ka minit kaba 7. Kane ka kynhun ka la thep biang ïa ka kol ba ar ha ka minit kaba 73 lyngba u Kemingstar Kharhunai na ka bynta ban ïoh jingjop shisyndon ha kane ka sngi.
Ha kawei pat ka jingïalehkai kaba la long kham shwa hapdeng ka Mawponghong bad ka Pomsanngut ki la ïakhaid mar 2-2 kol. Ïa ki kol jong ka Pomsanngut la thep da u Ryngkatbor Kharbani ar kol ha ka minit kaba 33 & 57, hynrei ka Mawponghong ka la lah ban pynphai kylla ar kol lyngba u Precious Jala (66) bad u Lastborn Marweiñ (68).
Ka jingïalehkai jong ka Third Division kan long ha ka Sngi Saitjaiñ hapdeng ka Wahnongkseh SC pyrshah ïa ka Laitmawpen SC ha ka por 11:40 mynstep, ka Mawpalong SC ïa ka Mawtyngngor SC ha ka por 1:30 nohphai sngi, katba ha ka 2nd Division ka jingïakhun kan long hapdeng ka Wahlyngkien Ramklang SC ïa ka Mawliehpoh SC ha ka por 3 baje janmiet.
