Copenhagen, Naiwieng:
Katkum ki khubor, la ong ba ka Museum Glyptotek na Denmark ka la pyntip ba kan sa pynpoi biang noh sha Turkey ia ka khlieh dur mot jong u Syiem Septimius Severus ba ka la dep buh pyni nam ha katei ka Museum mynta palat 50 snem.
Kane ka jingpynbna na katei ka ri ka long hadien ka jingpyni nia kaba la neh haduh 18 bnai lynter bad ka Ankara kaba la kynnoh ba ia katei ka khlieh dur mot jong utei u Syiem la shah tuh naduh ka por mynshuwa.
Namarkata, la ong ba ka Glyptotek ka la rai ban phah noh ia utei u dur mot sha Turkey kumba la kyrpad da kane ka ri ban pynphai noh ia ki dur- ki dar bad ki dur mot kiba long ki dak sah kynmaw jong katei ka ri.
Namar la ong ba utei u dur mot jong utei u Roman Emperor uba la im naduh u snem AD145 haduh 211, u la don ha United States da ki phew snem shwa ba un poi noh sha katei ka museum jong ka Ney York.
Hynrei, la phah biang pat ia utei u dur mot baroh shi rynieng sha Turkey ha kine ar snem ba la leit, pynban ka khlieh pat ka dang sahkut ha Denmark.
Ha u snem 1979, uwei u nongpeit jong kawei ka museum u ngeit ba katei ka khlieh dur mot ba la ioh ha u snem 1970 khlem ka jingtip jong ki bor pynïaid, ka dei ka khlieh jong utei u dur mot bym don khlieh shuh uba don ha US.
Kumta, la ong ba ia kitei ar bynta jong utei u dur mot uba la shna da ka rnong la ioh ban pyniasoh biang noh na ka bynta ka jingpyni nam bad ka jingpeit thuh jong ki nongpeit ba la buh khnang jong ka Turkey.
