Pynkhreh Syngkli
Ka jingim jong ngi ki briew ha kine ki sngi mynta, ngi pyrkhat beit tang ïa ka spah, hato ngi ju pyrkhat pat mo kaei ka ban jia ?
Ka jingkylli hangne ka eh shisha ban jubab, namar ba bun hi na ngi ki briew ngi pyndonkam ïa ka, bad ngi kwah hi ïa ka, namar lada ngi don ka spah, ngi ïoh lut kaei ba ngi kwah. Hynrei kawei ngan ong ïa phi, ka spah hooid ka lah lut ban leh ïa kiei kiei baroh, hynrei pat ka long ruh ka nongpynïashun, bad ka nongshet kylla ïa ngi shisien ka sngi. Phi tip balei nga ong kumne ? Bad namar balei ?
Nga ong kumne namar ngi ki briew ha kine ki sngi mynta ngim ju pynkhat ïa ka lawei ba hadien, bad ngim salia hi ruh ban leh wat ïa ki kam kiba sniew, wat lada ngi la tip ba ki long ki bym dei ban leh, kum ban shuh ai nuksa, kum ka jingtip ïa u marpoh khyndew u (uranium) une u lah ban ktah ïa ka koit ka khiah, hynrei tang ban ïoh spah ngim salia ïa kata, bad dang bun kiei kiei kiba ngi ïoh. Bad sa kiwei de kiba ngim tip shai, bad ngim da don kam ban ïa kren ne ïathuh ïa phi, phi la ïa sngewthuh hi.
Bad kawei pat de ngan ong ïa phi, ki don ki briew hangne ha ri Khasi jong ngi, wat ki jaka ki puta ruh ki die ha kiwei pat ki jaitbynriew, tang ba kin ïoh ïa ka spah, kim pyrkhat shuh ïa ki parajait bynriew lade, namar ki sngewthuh ban da die ïa u parajait kan kham duna dor, hynrei da die pat ïa u bar jylla kan kham heh dor, kane keiñ ka la sdang kata ka jingeh bad jingjynjar ïa ngi, namar haba ngi la die duh ïa u nongwei, une lah ban wan shong shnong hangne bad une u nongwei u lah ban leh katba u mon namar haba u la don la ka jaka ka puta kaba u la thied, u lah ban trei ban ktah, ban leh katba u donkam, bad kane ka wanrah ïa ka jingeh bakhraw ïa ka ri Khasi jongngi ha kine ki sngi mynta.
Bad ka don ruh sa kawei pat ka jingkamai spah jong ngi ki briew, ka long ba ngi leh da kiwei pat ki kam kaba ngim sngewthuh bad ngim tip kaei ban jia ha-dien ïa ngi. Ka jingleh kine ki briew ka ïalam sha ka jingeh ba khraw ïa ngi hi ki khun Khasi-Khara bad ngin sa ngat ha kiwei pat ki jaitbynriew. Kane ka jingeh ba khraw ïa ka ri Khasi jong ngi baroh kawei kum ban shu ai nuksa kumba ngi ïohi mynta shibun ki Sengbhalang ki ïaleh ban pynherkrat ban beh thong ïa ki bar jylla hynrei kim lah satia namar ba bun hi pat kiba dang kwah ban rhah spah na kata ka daw ka dang eh ban leh ïa kine, namar lada ma ngi u rit u ria ngi da kwah ruh ngim lah kam myntoi, ban leh, hangne keiñ phi ïohi ïa kita ki briew, kine ki briew ki don ka jingnang jingstad bad ki shong ruh ha ki shuki, bad ki synshar ruh ïa ngi ki rit ki ria. Kine ki riew ki sngew ïalade ba kitei kin lait lada ki leh kumne ruh namar ba ki don spah bad ki don ka jingnang jingstad, hynrei kim tip pat de ba kine ruh hi kin ngat lang ha kajuh hi ka apot kumba ngat u rit u ria, u duk u suk, namar ba dei na ki hi ki mih ki jingeh bad jingjynjar, ma ngi u rit u ria u duk u suk lei te ngin sa shuh shah ring mraw, hynrei ma ki te kin lait, namar ki don ka spah ki lah ban leit sah ne leit shong shnong kylleng kylleng kat shaba ki sngewbit, hynrei pat ka jingeh bad jingjynjar ka kham palat ma ki, ban ïa ngi, namar kine mynba ki dang don ha la trep bad ha la ka ri bad ka jait bynriew, kine ki ioh lut kat ba ki kwah bad ki long ruh ki nongïalam nongsynsharïa ka ri bad ka jaitbynriew bad ki don ka kyrdan bapher bapher, bad ki shong ruh ha ki shuki, bad ki trei kam tang da kaba bat khulom.
Hynrei ynda haba kine ki la poi sha kawei ka jaka kine ki hap ban trei shitom bad kin ïoh laitluid, ka mynsiem jong ki kan lynga, namar ba kine kim dei ki briew kiba mlien ban trei shitom, bad ki ba la im laitluid, shisien hi haba ha la ka ri bad ka jaitbynriew kim don shuh, ki hap ban mad ki jingeh bad jingjynjar ba shyrkhei bad hangne keiñ ka spah ka pyni ba ka shet shukor ïa ki.
Kumta ko ki para Ri bad jaitbynriew jong ngi to kyndit thiah noh wat phohsniew tang ia ka spah, namar dang don ka por lada phi la kloi, bad wat pynslem shuh, ioh phi ngat ha ka lanot ba khraw bad ka jingshah ring mraw pat ha kiwei ki jaitbynriew. Wat ïaleh biej to long kiba sian ha ka synshar khadar, bad to khapbrip ki khmat bad set ki shkor, lada phi la shah pynbiej ha ka spah, ne phi la shah pynngop ruh ioh ba hadien phin shuh shah knieh lut baroh wat kaba phi la don ruh, bad ioh phi shuh phetwir bad shah pynlong ki nongtong um ha kiwei pat ki jaitbynriew.
