Shillong, Nohprah 01
Ka kynhun jong rangïalehkai kiba la 60 snem shaneng na Meghalaya ki la khur ïa ka takma ksiar ha ka North East Masters Table Tennis Tournament 2024 kaba la kut ha ka sngi Saitjaiñ ha Kohima hadien ba ka la lah ban pynliem noh ïa ka Mizoram da 3-1.
Ha ka jingïakhun kaba para marwei jong kiba la 60 snem shaneng, u Santanu Ghosh u la la jop ïa u Harendra Singha. Kine baroh ar ngut kiba la rung sha ka final ki dei na Meghalaya. Katba ha ka Men’s Doubles la jop da u Santanu Ghosh & R.B Das ïa u Bah A.G West & Harendra Singha. Kine ruh baroh arliang ki dei na Meghalaya.
Ha ka Mixed Doubles, u Santanu Ghosh (Meghalaya) lem bad ka Shyamali Banik (Tripura) ki la khur ïa ka takma rnong.
Kumba ka long mynta kane ka long ka sien kaba nyngkong eh ba ki nongïalehkai T.T na Meghalaya ki la lah ban khur bun tylli ki takma ha ka North East Tournament. Kine ki kynthup ïa 3 ki takma ksiar (Team/Individual singles/Doubles), 2 ki rupa (Individual Singles/ Doubles) lem bad kawei ka takma rnong (Mixed Doubles).
