Ngi ki briew hangne ha sla pyrthei ngi lah ban lait na kiba bun ki jingsniew kiba ngi ïa kynduh bad kiba ktah ïa ka jingim jong ngi ki briew. Bun lehse kiba lait na ki jingdih ba sniew kum u drok, u kanja, ka kiad u sikret, u biri bad na ki kam pyniap briew, ki kam klim, ki kam sakhi lamler ki kam tuh kam thiem, ki kam thok kam shukor bad bun kiwei kiwei ki kam im lyngkar kiba pynthohbria ïa ka jinglong briew. Hynrei ym don uba lah ban lait na ka pop da lei lei ruh. Ki nongkit kam balang kiba ïalap ïa ki khubor babha sha ki briew ruh kim lah ban lait na ka pop. Wat la ki phla ïa u Blei man ka taïew lyngba ki jingïaseng lang, hynrei kin ym lah da lei lei ruh ban pyllait na ka sni jong ka pop. Balei nga ong kumta, ka long namar ka jingïap ka long ka bainong jong ka pop. Hato ngi ki briew ngi lah ban lait na ka jingïap? Em, ym don wat uwei ruh uba lait na ka jingïap. Ka jingïap ka sar bad rat naphang ïa ngi ki briew haba la dei ka por ba ngin ieh noh ïa kane ka pyrthei shong shipor. Kane ka long ka khubor ba nga don ban pynpaw ha phi ki lok ki jor, ki para kur para kha, ki para shnong para thaw ki para ri bad ki para ba ïa im bad ïa shong ïa sah ha kane ka pyrthei sngi. Ym don uba lah ban lait na ka pop kaba long ka jingïap bad kaba dei ka nongshun kaba khadduh ïa ngi ki briew. Ngi im sngewbha bad im bha katno-katno ruh lane ngi im sniew katno-katno ruh ha kajuh ka lynti ngi hap ban ïa leit lang ha ka akher ka sngi. Sha ka ri ka lah shuh ban ïa kynduh wat shi kpa shi kmie bad ryngkat ki khun ki kti ruh kiba wan na kajuh ka ïing ka sem katba dang im ha kane ka pyrthei. Kane kein ka dei kata ka pop kaba khraw kaba ngim lah ban lait kum ki briew katkum ka jingisynei ka jong u Trai nongbuh nongthaw ïa ngi ki bynriew.
C. B. Iawphniaw
