Shillong, Nohprah 01
Ka Senior Women Selection Committee jong ka Meghalaya Cricket Association ka la jied haduh 15 ngut ki ‘thei ïalehkai lem bad kiwei kiba la pynap lypa ban mihkhmat ïa ka Jylla sha ka Senior Women One Day Trophy ban pynïaid da ka BCCI ha Haryana naduh ka 4 haduh ka 16 tarik mynta u bnai.
Ïa ka jingjied yn sa bishar biang hadien ki ar tylli ki jingïalehkai ba nyngkong katkum ka jinglah jong ki nong-ïalehkai. Ka jingïalehkai ba nyngkong jong ka Meghalaya kan long pyrshah ïa ka Karnataka ha ka 4 tarik ka ban bud sa ïa ka Pondicherry ha ka 6 tarik.
Ka jingpynkhreh ïa kane ka lympung ïalehkai la pynlong ha Jagiroad, Assam, naduh ka 17 haduh ka 30 tarik u Naiwieng bad kane ka kynhun ka la leit sha Haryana ha ka Sngi U Blei.
Ki ‘thei ïalehkai ka Jylla ki kynthup ïa ka Debasmita Dutta (C), Riticia Nongbet (VC), Luiza Tamang, Monica L Phawa (WK), Daiaka E Warjri, Suriti Kumari Ray, Rebeldalis Syiemlieh, Ajima Sangma, Sara-dafica Kharbani, Reitriki Pohshna, Ankita Sharma, Indariakor Kharwanñiang, Neha Hajong, Dubleen Nengnong (WK) lem bad ka Solina Jaba, katba kiwei kiba la pynap lypa ki long ka Ruby Chettri, Deiphibapynshngain L Mawnai, Neelam Roy, Monicable Marbaniang bad ka Anchal Singh.
Ki coach ki long ka Deepali C Patkar (Head Coach), Bah Mackie D. Blah (Assistant Coach), Wandashisha Dkhar (Phy-sio), Darishesha Mawroh (Trainer) & Sanvert Kurkalang (Manager).
