Shillong, Nohprah 01
Ka “Europe” kaba dei ka kynhun tem ba pawnam na Sweden ka la pynlynguh hi pum ïa ka madan ha Me’gong Festival kaba la long ha Baljek, West Garo Hills. Kane ka kynhun kan pynsah kynmaw ruh shirta ïa palat 90,000 ngut ki paidbah kiba la leit ban sakhi ïa katei ka tamasa.
Kane ka kynhun kaba pawnam na ki jingrwai kum ka “The Final Countdown”, “Carrie” bad kiwei-kiwei, ka la wan tem biang sha India hadien 36 snem. Ka sien ba ka wan tem khatduh ka dei ha Mumbai ha u snem 1988.
Kaei kaba pynlong ïa kane ka tamasa kaba kham kyrpang shuh shuh ka dei ka jingwan tem ruh jong ka kynhun rwai ‘rock’ ba pawnam ka Ri India, ka Indus Creed, kaba la kiew lang ha kajuh ka rynsan bad ka Europe. Ka Indus Creed ka la plie ïa ka rynsan na ka bynta ka “Europe” ha Mumbai ha u snem 1988, ha ka por ba dang tip ïa ka kum ka “Rock Machine”.
Ka Me’gong Festival ka la khring ïa ki riew ieid jingrwai na kylleng ka Ri India bad na kiwei ki Ri ruh kumjuh, ïa kaba bun ki ngeit ba kan dei ka sien wan ba khatduh jong ka kynhun tem “Europe” sha Ri India.
Ha ka sla ‘Facebook’, ka Europe ka la pynpaw ba kan kynmaw ïa kane ka miet ha Me’gong Festival bad ong, “Ngim lah ban ap ha ka ban wan phai biang bad ban ïohi biang ïa phi”.
U Myntri Rangbah ka Jylla Conrad K Sangma, u Myntri kam Jngohkai Bah Paul Lyngdoh, u Myntri ka tnat PHE u Marcuise Marak, u Chief Secretary ka Jylla Bah DP Wahlang bad u Commissioner ka Tourism u Dr Vijay Kumar, la ïohi ba ki la shongshit bha bad kyrïuh naphang ha ryngkat ki jingrwai jong ka “Europe”.
U Myntri Rangbah u la pdiang dalade ïa ka kynhun Europe bad kiwei ki kynhun tem kiba wan sha Meghalaya bad sha Rilum Garo. U la pynpaw ba ki paidbah ka Jylla bad ka North East baroh kawei, ki la heh la san ha ba sngap ïa ki jingrwai jong ka “Europe” bad ka dei ka jingphohsniew kaba la urlong shisha ïa kiba bun ban ïohi Live ïa kane ka kynhun tem.
U la pynpaw ruh ba ka thaiñ ka dei kaba ieid bha ïa ki jingrwai rock jong ki snem 80 bad 90 bad ka Me’gong Festival ka la khring ïa kiba bun ki riew ieid jingrwai na kylleng ka Ri.
“Ngim la ap ban kiew rynsan ha ka Me’gong Festival ha Rilum Garo. Ka long kaba sngewkmen ba ki jingrwai jong ngi ki la poi shaduh sha kane ka jaka ba kyndong jong ka pyrthei” ong u Joey Tempest, Nongrwai ka Europe.
“Nga kynmaw ïa ki briew ba ieid ïa ki jingrwai jong ngi ha u snem 1988 bad ngi kmen ban ïohi ïa kajuh ka jingieid hangne. Kane ka jingwan jong ngi sha Rilum Garo khlem pep kan nang ai mynsiem ban thoh ïa ki jingrwai jong ngi”.
U Joey Tempest u la ïaroh ïa ka jinglong ka sawdong sawkun ka Ri-lum Garo bad ong “Ka Kynhun ka dang dei kawei na kiba tbit ha kane ka pyrthei bad ka jingktah jong ki jingrwai jong ngi ka dang khraw bah” u la ong bad bynrap “Ka put ka tem kan ym ïap! ka jingrwai rock kan ïai im beit”.
