Nuuk, Nohprah:
Katkum ki khubor, la ong ba ka Nuuk, kaba long ka nongbah ba heh duh jong ka Greenland, ha kane ka kynti ka la ioh ia ka Kad Liengsuiñ bathymmai kaba don ia ka lynti ïaid liengsuiñ kaba jrong kumba 2,200 meter lane kumba 7,217 phut ka jingjrong. Kumta la ong ba katei ka Kad Liengsuiñ ka la lah mynta ban pdiang ia ki liengsuiñ kiba kham heh ba kin leit hiar sha katei ka jaka bad ka la lah ruh ban iatrei lang bad ban pyniasoh bad kiwei pat ki bynta bapher bapher jong ka pyrthei ynda la dep pyntreikam bha ia kane ka Kad Liengsuiñ.
Namar kumba la ju ioh ban buh jingkheiñ, la iohi ba ki ju don kumba 1,30,000 tam ki nongleit jngoh kai lane ki ‘riew shangkai pyrthei kiba ju leit poi sha Greenland man la u snem.
Namar kata, la khmih lynti ba ka kam jngoh kai bad ka jingleit rung jong ki briew sha katei ka ri kan nang kiew bad kan nang iarap ruh ban kyntiew ia katei ka ri ha ki liang bapher bapher khamtam kan iarap kyntiew ruh ia ka ioh- ka kot jong katei ka ri lyngba ka kam jngoh kai pyrthei bad kumjuh ia ka ioh ka kot jong katei ka Kad Liengsuiñ.
U heh ka tnat ba dei khmih ia ki kam Liengsuiñ ha Greenland, u Jens Lauridsen, u la buh jingkheiñ antad ba la kumno-kumno, tang na kawei ka liengsuiñ ka la lah ban kyntiew ia ka ioh-ka kot jong ka ri kumba $2,00,000.
