Kohima, Nohprah:
Kum ka jingpynkhreh ïa ka tamasa Hornbill kaba 25 sien, kaba la sdang naduh ka 1 tarik haduh ka 10 tarik u Naiwieng 2024, u heh pulit ka Kohima, u la pynmih ïa ka jingbthah kaba bniah halor ka jingïaid kali kaba thmu ban pynthikna ïa ka jingïaid kali kaba khlem jingeh ha ka shnong Naga Heritage, Kisama.
Kumba la pynbeit, la ong ba la khang ïa ki kali heh ban rung shapoh ka jylla Kohima hapdeng ka por 7:00 baje mynstep haduh 10:00 baje mynmiet ha kane ka tamasa. Ïa kum kine ki kali yn pynsangeh ha ki jaka ba la buh ban khmih bniah ha Peducha bad Khuzama.
La shah tang ïa ki kali kiba don ïa ki Car Pass ba la ai da ka Police Headquarter (PHQ) ban rung sha ka jaka pynlong jingïalang Kisama lyngba ka khyrdop No. 1 ha ka surok bah National Highway.
Ki kali jong ki nongpynïaid ïa ki tamasa bad ki nongdie jingdie kiba ïeng ha ka jaka Amphitheater Heritage ki dei ban bud ryntih ïa ki por ïaid ba kyrpang: shwa ka por 9:00 mynstep lane hadien 4:00 janmiet. Kine ki la dei ban mih lyngba ka lynti jong ka Rhododendron Resort. Ki kali ki bym don Car Pass ki la hap ïeng ha madan paidbah ha Kigwema.
Ka jingshakri kaba khlem jingsiew ki pynpoi ïa ki nongwan jngohkai hapdeng ka jaka ïeng kali bad ka jaka pynlong tamasa. La bthah ïa ki kali na Dimapur/Chumoukedima kiba leit sha Kisama ba kin pyndonkam da ka lynti kaba kham duna ka jingkhapngiah lyngba ka Jotsoma, Nagaland College of Music and Fine Arts, Forest Colony, bad Phesama. Yn buh ïa ki board ba pyni ïa ka jingbthah.
Ki trai kali ki dei ban pyni ïa ki Contact Number jong ki ha ki jingkhang haba ki pynïeng kali ha Kigwema lane ha kiwei kiwei ki jaka.
Ïa ki kali kiba ïeng harud ka surokbah National Highway (NH) hapdeng ka Phesama bad Kisama hapoh ka Right-Of-Way (ROW) yn tan khlem da ai jingmaham, ha kaba ka jingkit bad ka jingsiew kuna yn kitkhlieh da ki trai kali.
