New Delhi, Nohprah:
Ki kompeni ba ju pynïaid ia ki rynsan ‘Social Media’ ha ka Sngi Thohdieng ki la pynpaw ka jingsngewkhia kaba jur haba iadei bad ka jingpynbna jong ka sorkar Australia ban khang bad pyrkhing noh ia ki khynnah hapoh 16 snem ba kin iadon bynta ha kino-kino ki rynsan Social Media. Na ka liang ki trai jong kitei kompeni ki la ong ba kane ka jingshim rai jong ka Australia ka long kaba kyrkieh bad kaba la pynkyndit ia ki namar kim ioh por ba kin pyrkhat bad pyntreikam suki-suki ia katei ka jingmaham jong ka Australia ba ki kompeni ba dei khmih ia kitei ki rynsan kin hap ban peit-thuh bha bad ban pyrkhing noh shi syndon ia ki khynnah kiba dang hapoh 16 snem.
Kumjuh ka tnat UNICEF ba dei khmih ia ki khynnah ha Australia, ka la ïasnohkti lang ha kane ka jingïakhun bad ong ba katei ka rai na ka Australia ka long kaba donkam ia ki khynnah ha kane ka juk mynta namar ka jingiadon bynta jong ki ha ki rynsan ‘Social Media’ kaba khlem kyndon ne jingpyrkhing, kan ialam ia ki sha ka jingjot.
Haba iadei bad kane, u heh katei ka tnat u la ong ba ka jingpyrkhing ia ki rukom pyndonkam ha ki rynsan kum ka Facebook, Instagram bad ka Twitter lane ka ‘X’, ba la mynjur da ka iingdorbar thaw aiñ jong ka Australia ha ka jan miet Sngi Palei, kan wanrah ia ki jingseisoh bad ka kham iarap ban tehlakam ia ki jingma kiba ap ia ki khynnah- samla jong katei ka ri hadien-habud.
Namar la ong ruh ba kine ki nongpyniaid jong kitei ki rynsan Social Media kiba long hi ki rynsan paidbah, ki dei ban don ka jingkitkhlieh ban pyrkhat lem ia ka bha ka miat ha ka imlang- sahlang bad khamtam eh ban pyrkhat ia ka jingshah ktah jong ki khynnah- ki samla na katei ka rynsan paidbah ka bym don jingpyrkhing bad kaba laitlan.
Kumta ruh la ong ba kito ki kompeni kiba dei khmih ia kitei ki jait rynsan paidbah kiba pher, lada kim lah ban bud ia ki aiñ ba la wanrah da ki bor pynïaid ka Australia ha kane ka sien, kin shah daiñ kuna bad shah khang noh shisyndon na ka ri ha ryngkat ka kuna Aus$ 50 Million lane kumba US$32.5 Million.
