Khliehriat, Nohprah 01
Ka Thangskai Tiger SC bad Rymbai Ïawpynsing SC ki la ïoh jingjop ha ka lympung ïalehkai Super Division Football Tournament na ka bynta ka 4th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA) ha ka sngi Saitjaiñ ha madan Artificial Turf kaba ha Diengshynrum.
Ha kane ka jingïalehkai, u Kiming Dkhar u la ïoh ïa ka hat-trick (67, 71 & 90+1) na ka bynta ban pynlong ïa ka Rymbai Ïawpynsing ban pynliem noh ïa ka Khliehriat West da 5-0 kol. Katba ïa kiwei pat la thep da u Hesmiki Rymbai ha ka minit kaba 60 bad u Slander Nongtdu (64). Da kane ka nam rem ka Khliehriat West ka la hiar kyrdan noh sha ka First Division naduh ka aïom ban wan.
Shwa kane ka Thangskai Tiger SC ka la jop pyrshah ïa ka Ladrymbai B SC da 4-1. Ïa ki kol jong ka Thangskai Tiger la thep da u Dukijuh Rymbai ha ka minit kaba 17, kumjuh u Pynthymme Rymbai (30) ubala thep da ka penalty bad ïa ki ar kol la thep da u Ruki Syrti (33 & 39). Katba ïa ka shi kol jong ka Ladrymbai B la thep lyngba ka penalty ba la shut da u Laxman Lamare (61).
