Khliehriat, Nohprah 02
Khnang ban pynsuk pyndep kloi ïa ka jingshna, jingpynthymmai bad maramot ïa ka surok bah National Highway-6 naduh Lumshnong shaduh Malidor, la khang na bynta ka jingïaid ki kali naduh kiba rit haduh kiba heh lyngba ka surok bah.
Ka por khang surok ka long naduh 9.00 baje mynstep haduh 3:00 baje nohphai sngi, kata 6 kynta bad ka ban sdang naduh ka 3 tarik Nohprah.
Haba pyntip ïa kane, u Deputy Commissioner & Chairman District Disaster Management Authority u la ong, namar ki jingtrei ïa ka surok bah ka dang ïaid shakhmat, kumta la mana tyngeh ïa baroh ki kali ban ïaid lyngba jong ka surok ha ka por ba la buh.
Ha kane ka jingkhang surok, yn shah ban ïaid tang ki kali ba donkam kyrkieh da kaba ïoh jingbit shwa. Kane ka jingkhang surok kan bteng tad haduh ba la dep ka jingpyntrei.
