Jowai, Nohprah 02
Ka All Jaiñtia Muster Roll Workers & Labour Union (AJMRW&LU) ha ka 2 tarik Nohprah ka la pynlong ïa ka jingïalang Central Executive Committee ha Iungwalieh ka Tpep Pale ban ïatai ïathir halor ka bainong sngi kaba ki nongtrei barit ka Sorkar ki dei ban ïoh katkum ka aiñ jong ki nongbylla sngi.
Nalor ka bainong sngi, ki nongtrei Muster Roll ki la ïakren ïatai ruh ïa ki ar tylli ki mat kata ka VDA (Variable Dearness Allowance) kaba ka Sorkar ka la dei ban pynkiew naduh ka 1 tarik Risaw 2024 bad ka Floor Basic Rate kaba dei ban kyntiew shisien san snem naduh ka 1 tarik Risaw 2023 katkum ka aiñ Minimum Wage Act 1958.
Ka Kong Wegetwell Rumut, General Secretary ka All Jaiñtia Muster Roll Workers & Labour Union hadien ka jingïalang ka la ïathuh ba ka seng ha ka 3 tarik Nohprah kan leit ban ïakynduh ïa u Vijay Kumar IAS, Commissioner & Secretary ka tnat Finance ka Sorkar Jylla ban pynsngew halor ki jingeh bad ki mat jingdawa.
Ka la bynrap ruh ba lada ka jingïakynduh kam urlong katkum ka jingkwah ka jong ki, ka seng ki Muster Roll ka la rai ban pynlong ïa ka jingïakhih shah thngan ba khlem buh por ka ban sdang naduh ka 17 tarik Nohprah ha nongbah Shillong.
Shwa kane ki nongtrei Muster Roll kiba trei ha ki tnat Sorkar bapher bapher ha East bad West Jaiñtia Hills ki la pynsngew ïa ki jingeh ha la ka jong ka jong ka bynta kumba ju ïai jia na ka por sha ka por da kaba kyntu ruh ïa ka Sorkar ban pynkiew ïa ka bainong sngi kaba ki dei hok ban ïoh namar kim lah ban im katkum kane ka juk rem namar barit palat ka jingsiew.
Ha kane ka sngi la donlang u nongaibuit ka seng u Ma KL Pariat uba la pynkynmaw ïa ki jingïaid lynti bad ki jingïakhih jong ka seng ha ka nongrim ban dawa ïa ka hok jong baroh ki nongtrei bylla sngi kaba ki dei hok ban ïoh na ka Sorkar.,
