Imphal, Nohprah:
Ki briew kiba la poi wir ha ki bynta jong ka ri, kynthup ïa ki khynnah rit, kiba la sah ha ki jaka sah shipor ba la buh ha Phayeng naduh ba sdang ka jingïakynad ha ki 19 bnai ba la leit, ki la pynlong ïa ka jingïakhih ha ka Sngi U Blei, da kaba dawa ban shah ïa ki ban leit phai noh sha la ki jong ki jong ki ïing ki sem. Ki nongïakhih, kiba la im bad ïakynduh jingeh, ki la kyrpad ruh ban weng noh ïa ka jingpynjlan ïa ka jingpyntreikam ïa ka Armed Forces Special Powers Act (AFSPA) ha ki hynriew tylli ki jaka ba hap hapoh ka jingkhmih jong ki pulit ha kylleng ka jylla Manipur.
Ki nongïakhih ki la pynpaw ka jingsngewsih jong ki, ha kaba bun ki la pynpaw ïa ka jingsngewkhia halor ka jingktah jong ka jingshah pynkynriah jaka jong ki kaba la neh slem, khamtam eh ha kaba ïadei bad ka jingduhnohg ha ki jingpule bad ka jingkyrmen jong ki khun ha ka lawei. Ki nongïakhih ki la pynpaw ruh ïa ki jingeh kiba ki bahaïing jong ki ki ïakynduh namar ka jingbteng ban pynjlan ïa ka AFSPA ha katei ka thaiñ, naba la sakhi ba ki jingbym shongsuk-shongsaiñ ks dang ïai bteng. Ki la kyntu ïa ka sorkar ba kan weng noh ïa ka jingpynjlan ïa ka AFSPA bad ban ailad ïa ki ban leit phai noh sha la ki jong ki ïing ki sem, ha kaba ki kyrmen ban tei pat ïa ka jingim jong ki bad ban ai ki lad ki lynti kiba kham bha ïa ki khun ki kti jong ki.
Uwei na ki nongïakhih haba kren sha ki lad pathai khubor, u la pynsngew ba katba ka sorkar ka dang pynbiang ïa ka bam ka dih bad ka jaka sah, hynrei ka jinglong jingman ha kaba ïadei bad ki kam thombor kam shym duna satia, naba ki jingpule jong ki khynnah ka la shah ktah jur. Ka la ban jur ba watla ki la ïoh ïa ki jingïarap kiba kongsan, ka jingeh ka wan naba ym lah ban pynbiang ïa ka jinghikai kaba biang ïa ki khun jong ki, da kaba bynrap ba ki kwah eh ban leit phai noh sha la ïing.
