Shillong, Nohprah 02
U Myntri ka tnat Social Welfare ka Jylla, Bah Paul Lyngdoh u la ong ba ka Sorkar Jylla kan pynbun shuh shuh ïa ki jaka sumar na ka bynta kiba la ngop ha u drok ha u snem ban wan ki ban pynïaid hi da ka Sorkar.
U la ïathuh ba ka Sorkar haduh mynta ka kyrshan pisa ïa khyndai tylli ki jaka sumar ïa kiba la ngop ha ka jingdih drok kynthup ïa kiba pynïaid da ki Balang bad kynhun shimet.
“Ngin pynbun shuh shuh ïa ki jaka sumar, ngi dang bishar ïa ka jingtyrwa ban don la kumno-kumno sa 15-20 tylli ki jaka sumar ïa kiba dih drok hapoh u 2025 ki ban dei kiba pynïaid da ka Sorkar”, u la ong.
Haba kylli halor ka jingïap jong ar ngut ki samla na Shillong ha ki jaka sumar (Rehabilitation Centre) kiba don ha Assam, u Myntri u la ong ba ka Sorkar Meghalaya ka shim khia bad la thoh sha ka Sorkar Assam. Dang shen u Rickelson Jyrwa na Golflink bad u Meban Syndor na Mawlai Mawtawar, kiba leit shah sumar ha Better Living Wellness Foundation, Mangaldai bad ha Alive Again Foundation, Chandrapur, Hatsila, ki la ïap ha ka rukom kaba pher bad pynartatien.
“Ngi la pan ïa ka kaiphot, ka shithi la phah ruh na ka Deputy Commissioner jong ka East Khasi Hills kaba la pan ïa ka kaiphot na ka tnat ba dei khmih jong ka Sorkar Assam”, u la ong.
U la ïathuh ba ha ka jingjia kaba kham mynshwa kaba la jia ha Mizoram ba la kynnoh shah lehbeiñ kiba phah sumar, ka Sorkar ka la tuklar bad shim khia.
“Mynta ka kynti ruh ngi la thoh shithi, u Principal Secretary jong ngi ruh u la kren ïa ki bor ba dei khmih ha Assam, mynta ruh ngan shong jingïalang ban bishar ïa kane ka kam”, u la ong shuh shuh.
Lah ban kdew ba ha kine ki khyndiat sngi ka la mih ka jingkynnoh pyrshah ïa kawei ka jaka sumar, ka Alive Again Foundation kaba don ha Chandrapur, Assam, ba ki nongpynïaid jong katei ka jaka sumar ki la lehbeiñ bad shoh beiñ ïa kiba leit shah sumar ha katei ka jaka.
