Shillong, Nohprah 02
Uwei u rangbah u la ieh noh ïa la ka kurim ha kawei ka kompeni kaba don ha Noida ha Uttar Pradesh, hadien ba u la shim boina ne ‘advance’ na u manager jong ka kompeni.
Katkum ka jingujor kaba la ai da kawei ka longkmie na ka shnong Phersakandi kaba don ha West Garo Hills ha ki pulit, la ong ba ar snem mynshwa, u pyrsa kurim jong ka, u Karimul Islam ryngkat bad ka kurim jong u (kaba dei ka khun jong katei ka nongujor) bad kawei ka longkmie ki la leit ban trei ha kawei ka kompeni kaba don ha Noida.
La ong ba kham hadien, u Karimul Islam u la phet na katei ka jaka trei hadien ba u la shim boina T.2 lak na u Manager jong ka kompeni. La ong bad kynnoh ba une u manager jong katei ka kompeni, u la shoh ïa ka khun jong ka bad khang pyrshah ba kan mih na katei ka jaka, katba kam pat lah ban siew dep ïa katei ka pisa.
Shuh shuh na ka liang katei ka nongujor, ka la ïathuh ruh ba na ka liang ki bahaïing u kurim jong ka khun jong ka ruh ki la byrngem-byrsit, haba ka la kylli pyrthew ba shano une u pyrsa jong ka u don.
