Amlarem, Nohprah 02
Ka Amlarem SCC ka la ïoh nam jop ha ka Super Division, katba ka Syntong Welfare, Samanong SC, EYC Amjalong ki la jop ha ka Lower Division Football Tournament ba la pynïaid da ka Amlarem Sub-Divisional Sports Association (ASSA).
Ha ka jingïakhun jong ka Super Division kaba la long ha madan Mini Stadium Ladjaplem ha ka Lah Sngi U Blei, ka Amlarem SCC ka la pynrem ïa ka Dongmihsngi Mupyut da 2-1 kol. Ïa ki kol jong ka Amlarem la thep da u Tip Rasmut tang hapoh 5 minit bad u Puson Rymbui (78), katba ïa ka kol jong ka Dongmihsngi la thep da u Elas Dkhar (15).
Haba phai sha ka Lower Division, ka Syntong Welfare ka la jop ïa ka Iaikyntiew Pamtbuh da 3-0 kol. Ïa kine kol la thep da u Kupar Langshiang ha ka minit kaba 3, Emi mylliem (28) bad Manshwa Langshiang (30).
Ha ka jingïalehkai kaba bud, ka Samanong SC ka la pynliem da 2-1 kol ïa ka FYC Amtapoh. Ïa ki kol jong ka FYC Amtapoh la thep da u Iban Bareh (17), katba ïa ki kol jong ka Samanong la thep da u Menot Maner (52) bad u Ïarap Suting (57).
Katba ka jingïalehkai hapdeng ka EYC Amjalong bad ka Mawlong SSC ki la ïakhaid mar 1-1 kol. Ïa ka kol jong ka Amjalong la thep da u Jovian Lynthong (4) bad ïa ka Mawlong ka thep da u Synchetmon Lamat (17).
