Washington, Nohprah:
Ka White House haduh mynta ka la ong ba kam pat lah ban wanrah ia ka jingiakren iasuk hapdeng ka Israel bad ka Hamas bad ka dang ialeh shitom ban ioh wanrah noh ia ka jingiabeit hapdeng kine arliang mamla na ka bynta ka bha ka miat bad ka jingshngaiñ jong ki paidbah nongshong shnong ka nongbah Gaza bad kumjuh ruh ia ki jong ka Israel. La ong ba dei namar na ka thma jong ka Israel ha Gaza kaba la sdang ban pynheh bad pynpur shuh shuh ia ka jingiakynad sha kiwei-kiwei ki ri marjan bad ka Israel bad kumta ka US ka la kyntu ruh ia ka Israel ba ka dei ban ialeh katba lah ban ym thaw jingiakynad shuh hynrei ban wad lad ban ioh iakren iasuk bad ban iabeit noh bad ka Hamas haba iadei bad ka jingsangeh thma bad kumjuh ruh haba iadei bad ka jingpynpoi iing noh ia kiba shah rahbor baroh kiba dang don ha ka kti jong ki lehnoh Hamas ha Gaza Strip.
Ka US ka la ong ba ka dang trei shitom ban leit kynduh ia ki nong-ialam jong kitei arliang mamla bad ban ialeh katba lah ruh ban pynkut noh kloi ia ka thma ha Gaza.
U nongai jingmut jong ka tnat ïada ka US, u Jake Sullivan, u la ong ba ka US kan pyrshang katba lah ban leit iakynduh ia ki nongialam jong kitei ar tylli ri bad ban wanrah noh kloi ia ka jingiakren iasuk hynrei u la pynpaw pat ba haduh mynta katei ka jingthmu ka dang long kaba tang na sla bad ka bym pat ia beit ne mynjur tikna.
Kane ka jingkren jong utei u heh ka US ka long ruh tang hadien shi sngi ba ka Israel ka la leit ther bom sha ki ktem lehnoh Hezbollah sha Lebanon.
Namarkata, u Sullivan u la ong ba ka US ka pdiang sngewbha bad ka ai jingkyrshan pura ia ka jingpynbeit bad ka jingiakren iasuk hapdeng kitei ki arliang mamla lada ki don jingmut shisha ban pynkylla dur bad pynbha noh ia ka jinglong-jingman nangne sha khmat. Haba iadei pat bad ki jingiakynad bad jing-iather bom hapdeng ka Israel bad Hamas, u Sullivan u la ong ba baroh arliang ki dei ban burom ia ki kyndon aiñ jong ka pyrthei bad kin kiar na ki jingeh bad ki jingma kiba khraw shuwa ba kin shim ia kano-kano ka rai.
Haba ai jingkren ha Jerusalem ha ka Sngi U Blei, u Myntri ka tnat kam bar ri jong ka Israel- u Gideon Saar u la ong ba ka don ka lad ban pynkut ia ka thma hynrei kata ka lad ka long tang lada ka Hamas kan pyllait noh shwa ia ki briew jong ka Israel kiba ka la rahbor naduh kaba sdang jong ka thma.
Pynban kaba la wanrah jingeh ia ka Israel bad ka Hamas haduh kine ki sngi ban poi sha ka lad jingiasuk ka dei namar ba ka Hamas kam pat pyllait tdot ia kitei ki briew jong ka Israel wat haba ka Israel ka la tyrwa ia ki jingiakren iasuk da kaba pyllait noh shwa nyng-kong eh ia kitei ki briew jong ka Israel.
