Shillong, Nohprah 02
U nongïalam ka National People’s Party (NPP) u Rakkam A Sangma u la ong ba ki nongïalam kiba la paw kim ju kham treh ban leit phai biang sha ka ïing barim. U Rakkam u la kren pharshi halor ka jingjop ka NPP ha ka ilekshon MLA shiteng samoi na Gambegre konstitwensi bad ka jingsakma ki MLA ka All India Trinamool Congress (AITC) ha kaba la don kiba kwah leit phai noh sha ka Congress.
Haba ki nongthoh khubor ki kylli la ka don ka lad ba ki MLA ka TMC kin wan ïasoh noh bad ka NPP lane kin leit phai biang sha ka Congress kumba ka paw, u Rakkam u la ong ba ki nongïalam kiba la paw kim ju leit phai sha ïing rim hynrei kin ïaleh ban tei ïa ka ïing lajong.
U Rakkam u la ai nuksa ruh ïa ki nongïalam kum u Captain Williamson A Sangma uba khlem leit phai shuh sha ka APHLC hadien ba u la leit sha ka Congress. U la ong ruh ba wat u Purno Agitok Sangma u khlem leit phai shuh sha ka Congress hadien ba u la mih.
Haba kylli la u Dr. Mukul Sangma u don ne em ka lad ban wan sha ka NPP ne leit phai biang sha ka Congress, u Rakkam u la ong ba um tip kaei ka daw ba u mih noh na ka Congress bad um lah ban ong eiei ïa u Dr. Mukul Sangma.
Ka NPP ka la pynrem ïa ka AITC bad ka Congress ha ka ilekshon MLA shiteng samoi na Gambegre konstitwensi.
Dangshen, ki nongïalam bad nongtrei ka AITC ha Nongthymmai konstitwensi ki la leit phai sha ka Congress bad kin ïarap ban shna lynti na ka bynta u MLA Bah Charles Pyngrope uba dei ruh u President ka AITC ha Meghalaya.
