Shillong, Nohprah 02
U Myntri ka tnat pule puthi u Rakkam A Sangma u la ong ba ki samla pule ka skulbah North Eastern Hill University (NEHU) kim dei ki nongshun bad donkam ban pynbeit noh kloi ïa ka jingeh ha kaba ka Sorkar Jylla ka la dep ban pynsngew sha ka Sorkar Pdeng.
U la ong ba ma u dalade u la thoh sha ka tnat pule puthi ka Sorkar Pdeng bad na ka liang u Myntri Rangbah ruh u la dep pynsngew sha u Myntri ka tnat pule puthi ka Sorkar Pdeng.
U Rakkam u la ong ruh ba ka tnat pule puthi ka Sorkar Pdeng ka la phah da u Vice Chancellor uba shipor bad la thaw ruh ïa ka Committee jong ki ar ngut ki ophisar ban tohkit halor ki jingkynnoh pyrshah ïa u Vice Chancellor u Prof. P.S Shukla kiba kynthup ïa ka jingbym biang ha ka rukom treikam jong ka NEHU, ka jingthung kam beaiñ, ka jinghiar kyrdan ka skulbah bad kiwei kiwei kynrum-kynram ha kane ka skulbah.
Haba kylli halor ka jingkheiñpoh u Vice Chancellor, Prof. Shukla ïa ka Sorkar Jylla ha kaba u la pan pulit pahara na ka Sorkar Pdeng ban pahara ïa u ba un wan kum u Vice Chancellor ha NEHU, une u Myntri u la ong ba um don eiei ban ong namar ka Sorkar Pdeng ka la thung ïa ka Committee ban tohkit ïa ka jinglong jingman ha NEHU.
“Ngi kwah ban pynbeit noh kloi ïa kane ka jingeh bad ngi kyrpad ïa ka Sorkar Pdeng ba kan leh ïa kaba donkam,” la ong u Rakkam.
U la ong ba ki samla pule ka Jylla kim dei ki nongshun bad mynta la ap ïa ka Sorkar Pdeng ba kan pynbeit noh ïa kane ka jingeh na ka bynta ka bha ka miat jong ka skulbah bad ki samla pule.
