Shillong, Nohprah 02
Ka Voice of the People Party (VPP) ka la sei kyrtong ban pynïakhun ïa ka ilekshon sha baroh 29 tylli ki konstitwensi jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC).
Ïa ka kyrteng jong ki kyrtong kiba dang sah na ki konstitwensi ki bym pat pynbna, ka VPP ka la pynbna ha ka Lah Sngi U Blei na ka bynta ban ïakhun ïa ka ilekshon MDC sha ka ïingdorbar thawaiñ, kata sa 2 ngut sha ka KHADC bad 5 ngut na ka bynta ka JHADC.
Lah ban pynkynmaw ba ha ka 13 tarik Naiwieng, ka VPP ka la dep ban pynbna paidbah ïa 27 ngut ki kyrtong ki ban ïakhun ïa ka ilekshon sha ka KHADC bad 24 ngut na ka bynta ka JHADC.
Ki kyrtong kiba la pynbna paidbah ha ka Lah Sngi U Blei kata na ka bynta ka KHADC ki long u Bah Kynjohlang Rangtong ban ïakhun na Mawhati bad Kong Deity Majaw na ka Laitumkhrah-Malki konstitwensi.
Haba phai pat sha ka JHADC, ki kyrtong ba dang shu pynbna ki kynthup ïa u Dr Samely Shylla na Amwi-Khliehtyrshi, Bah Thiyo Lapasam na Saphai-Sahsniang, Bah Soki Lapasam na Muthlong-Sohkymphor, Bah Tyngshaiñ Phawa na Khliehriat-Rymbai bad Bah Prince Sukhlein na Saipung-Nongkhlieh.
