Shillong, Nohprah 02
Ka kynhun ïalehkai Roll Ball Under-17 ka Jylla ka la pynmih ïa ka jingkhihwin ha ka lympung ïalehkai 2nd Junior East Zone National Roll Ball Championship 2024, kaba la long ha Guwahati, Assam naduh ka 30 tarik u Naiwieng haduh ka 1 tarik mynta u bnai Nohprah.
Ka Meghalaya ha kane lympung ka la don ha ka Pool-A. Ka la ïakhun pyrshah ïa ki kynhun kiba khlaiñ bor kum ka Assam kaba dei ka kynhun kaba pdiang ïa kane ka jingïakop. Wat la ka dei ka kynhun kaba dang kham thymmai hapoh ka Jylla, hynrei ka la pyni ïa ka jingtbit, ka jingkut jingmut, bad ka jingïatylli, kaba la ïoh ïa ka jingïaroh bad burom na ki nongïalehkai pyrshah bad ki nongpeitkai kumjuh.
Ka jingïalehkai ba itynnad jong ka kynhun ka kynthup ïa ka jingjop kaba itynnad pyrshah ïa ka Bihar, ka jingïakhaid kaba tyngeh bad ka Arunachal Pradesh, bad ka jingshah rem ha ka jingïakhun kaba jan bha pyrshah ïa ka Assam.
U nongïalehkai ba pawkhmat ka Meghalaya u Dawanme George Chyrmang bad kumjuh kum kapten u la lah ban pyni ïa ka jingtbit ba phylla namar u la thep bun eh ïa ka kol kaba long haduh 7 kol na ka bynta ka Meghalaya. U la thep ïa ka kol kaba stet tam ha kane ka lympung kata tang hapoh 10 sekhon.
Wat la ka kynhun ka la shah rem bad duh rung sha ka semi final, hynrei ka jingpyni jong ki ïa ka sap ïalehkai ka la buh ïa ka jingsah jingkynmaw ha ki nongsakhi bad ki ‘riew ïeid ïa ka jingïalehkai Roll Ball.
“Ngi sngew sarong haduh katta-katta ïa ki nongïalehkai samla jong ngi na ka bynta ka jingshlur, ka jingtbit, bad ka jingaiti lut jong ki. Ban ïakhun pyrshah ïa ki kynhun kiba eh tam ha ka Pool A bad ka dei ka kam kaba eh bha, hynrei ka kynhun jong ngi ka la kiew shaphrang ban ïaleh ïa ka jingeh bad ka la pynshisha ïalade ba ki dei ki nongjop ba shisha.”
Na ka liang jong ka Meghalaya Roll Ball Association ka ai khublei kyrpang ïa kane ka kynhun ïalehkai bad ka khmih lynti ruh ïa ki jingtrei shitom jong ki hadien habud.
