Jowai, Nohprah 02
Ka Demthring ka la rung sha ka final ha ka Super Division Football Tournament na ka bynta U Kiang Nangbah Memorial Trophy ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka la lah ban pynliem noh ïa ka Nangbah Mulang da 1-0 kol ha ka semi final kaba nyngkong (Qualifier-1) kaba la long ha ka Lah Sngi U Blei ha madan Kiang Nangbah Stadium, Jowai.
Haba phai sha ka jingïakhun, baroh ar tylli ki kynhun la sakhi ba ki la lah ban tehlakam bha ïa ka bol tad haduh ba jingïakhun jong ka kylla step ka la kut khlem da lah ban pynkhih jar kol.
Haba bteng biang sa ha ka kylla miet ki rangïalehkai na ki ar kynhun ki la ïakhun tyngeh ban ïoh thep kol, hynrei ha shwa ba ka jingïalehkai kan poi noh artad sha kaba kut ka Demthring ka la ïoh ban thep eh daw ïa ka shi kol na u Marshial Nongrum ha ka minit kaba 90+2 na ka bynta ban ïoh jingjop syndon.
Ka jingïakhun semi-final ba ar (Eliminator) ha ka Sngi Ba-ar kan long hapdeng ka Wahïajer pyrshah ïa ka Ladthadlaboh ha ka por 1 baje nohphai sngi.
Ha ka 7 tarik mynta u bnai ka jingïakhun semi final balai kan long hapdeng ka Nangbah Mulang pyrshah ïa ka kynhun kaba jop ha ka semi final ba ar.
