Shillong, Nohprah 02
Ha kawei ka durkhih kaba la saphriang ha kylleng ki rynsan ‘social media’ ha kaba la ïohi ba uwei u khyllung uba dang 1 snem tam ka rta, u la sahkut ka khlieh hapoh u khiewja bad la lah pat ban loit noh ha Civil Hospital Shillong.
Haba ïohi ïa kane ka durkhih ba ka la saphriang sted bha, na ka liang U Nongsaiñ Hima ha ka 2 tarik u Nohprah 2024, u la wad bniah ïa katei ka jingjia ha kaba la ïoh ban ïakynduh ïa u kpa bad ïa ka kmie jong utei u khyllung kiba dei kiba shong ba sah ha ka shnong Lawsohtun Block-3.
Haba pyrshang ban kylli halor kane ka jingjia, na ka liang u kpa jong utei u khyllung ïa uba la tip kyrteng kum u Bah Donboklang Lyngdoh bad ka kmie ka Kong Jesinta Langpen, ki la ïathuh ba utei u khyllung uba dang don 1 snem tam, u la ïalehkai bad utei u khiewja ha ka 29 tarik u Naiwieng 2024 da ka jingmutdur ba utei u khiewja u long kum ka ‘helmet’. Kumta u la phrung hapoh utei u khiew ïa la ka khlieh bad ka dei ha kum katei ka por ba ka khlieh jong u khyllung ka la sahkut noh shapoh kat haduh ba ym lah shuh ban sei wat hadien ka jingpyrshang ban loit hi ha ïing bad kaba la pynlong noh ïa ki kmie-ki kpa jong utei u khyllung ba kin hap ban leit rah noh ïa u sha Civil Hospital Shillong ban phah loit ha ki doktor.
U kpa jong utei u khyllung u la ïathuh ba man la ka por haba u la wanphai sha la ïing hadien ka jingwan bylla, utei u khyllung u ju pan ïa ka ‘helmet’ ban ïalehkai bad phong ha khlieh. Hynrei ha katei ka sngi ba la jia katei ka jingjia, utei u kpa um don satia ha ïing namar u la mih ban leit sha ka jaka bylla. Ka dei ha kum katei ka por ba u khun jong u, u la ïalehkai bad u khiewja da kaba phong ha khlieh bad kaba la pynlong ba utei u khiewja un sahkut ha khlieh.
Na ka liang ka kmie ka la ïathuh ruh ba kam don satia kano-kano ka jingmynsaw ne ka jingmong ha ka khlieh jong utei u khyllung.
