Nongstoiñ, Nohprah 02
Ha kine ki khyndiat sngi ba la dep, kata ha ka 22 tarik u Naiwieng 2024, katto-katne ki briew ki la leit ban tur sha shlem treikam jong u Syiem ka Hima Nongmynsaw ha kaba u Acting Syiem ka Hima Nongmynsaw u Bah Phlowel Syiem u la shah ktah kti.
Katkum ka tyllong khubor bad katkum ki dur khih ba la ïoh, la ïohi ba kitei ki briew ki la shoh bad ktah kti ïa u Acting Syiem hakhmat ka jingdon lang jong kiwei kiwei nong kitkam ka Hima Nong mynsaw ha shlem treikam jong u Acting Syiem ka Hima Nongmynsaw kaba don ha Langpih kata hadien ka jingïania bad ïakren kaba khluit bha.
U Secretary ka Hima Nongmynsaw u la ïathuh ba halor katei ka jingjia, na ka liang ka Hima ka la dep ban buh ïa ka jingujor sha ki pulit.
Haba jubab kaei ka daw kaba la pynmih ïa katei ka jingjia haduh ban da shah ktah kti u Acting Syiem, u Secretary ka Hima Nongmynsaw u la ong ba ym shym la tip hynrei jin lada ba ki kwah ban ïakren bad la don kino-kino ki daw, ka Hima ka don ka lynti ban ïakren lada duna ha ka liang ki jong ki lane u Acting Syiem hynrei la shu wan ban thombor beit ïa u Acting Syiem.
Ha kawei pat ka liang ka Synjuk ki Nongsynshar Shnong Nongmynsaw Syiemship ka la pynpaw ïa ka jingsngewkhia ïa ka jingshah ktah kti jong u Acting Syiem ka Hima Nongmynsaw Syiemship ha ki katto-katne ngut ki briew kiba dei napoh ka Shnong Mawiamsyiem kaba la jia ha ka 22 tarik u Naiwieng 2024.
U Bah Teiborlin Nonglang, President ka Synjuk haba kren bad ki nongthoh khubor u la ong, “Kum ka Synjuk ngi pynrem jur ïa ka jingleh riewkhlaw kaba la ktah matïong ïa ka burom ka ijot jong ka dong ka thaiñ hi baroh kawei tang na ka jingleh khlem burom”.
Shuh shuh u la ong ruh ba ha kaba ïadei bad ki kam synshar khadar ha ki shnong ki thaw ym lah ban tuklar na kawei ka shnong sha kawei pat ka shnong hynrei kat ban ktah kti kat ïa ka burom jong u Acting Syiem ka long kaei-kaei ka bym lah ban pdiang.
U Bah Teiborlin u la ong ruh ba ka Synjuk ka kyntu ïa ki bor ka aiñ ba kin ym dei ban leh sting khnang ba kan ym ïai mih kiba kum kine ki kam hadien habud hapoh kane ka dong ka thaiñ, khamtam hapoh ka Hima Nongmynsaw kaba dei kawei na ki thaiñ kaba dang don hapdeng ka jingeh ha kaba ïadei bad ki jingïakajia pud hapdeng ka Meghalaya bad Assam.
Ha kajuh ka por na ka liang ka Synjuk ki Nongsynshar Shnong ka kyntu jur ïa baroh ki Sordar Shnong ba lada don kano-kano ka kam kaba kim sngew ïahap ne sngew ïadei ïa ki kam ba la pynïaid da ka Hima kin sngewbha ban ïaid da ka lynti ka aiñ khnang ba kan ym mih kano-kano ka huri-hura kaba pynjah burom ïa ka dong ka thaiñ hi baroh kawei.
