Shillong, Nohprah 02
Ka jingshah prong tuh jong ki ïing ki sem, ka jingshah tuh ki kali bad ar shaka kat nang mih ka la nangjur haduh katta-katta la ka long ha nongbah Shillong ne wat ki shnong shabar jong ka nongbah.
Katkum ka khubor kaba la ïoh na ki pulit la ong ba ka Sushma Biswa ka la ujor sha ki pulit ba ha ka 27 tarik u Naiwieng, ki runar bym lah ban ithuh ki la prong tuh ïa ka ïing jong ka kaba don ha Upper Mawprem, Shillong bad tuh ïa ka ksiar kaba khia shi tula ryngkat bad ka pisa kaba long 40 hajar tyngka.
Ha kawei pat ka khubor na ki pulit la ong ba u Angshuman Dutta u la ai ka jingujor ba ha ka step jong ka 29 tarik Naiwieng, ki runar bym lah ban ithuh ki la prong tuh ïa ka ïing jong u kaba don ha Mawbah, Barapathar, Shillong bad ban tuh ïa kawei ka mobile phone bad ka pisa 10 hajar tyngka.
Kumjuh ha kawei pat ka khubor, u Bah Gareth M Kurbah na ka shnong Mawpun Golf-Links, Shillong u la ai ka jingujor ba ha ka 29 tarik Naiwieng, ha ki por kumba 3.30 eiei dang step, ki runar bym lah ban ithuh ki la prong tuh ïa ka kali Maruti Alto 800 jong u, kaba don ïa u registration number ML05-Z-8394 bad ban tuh ïa ka music system.
Ha kawei pat ka khubor, u Tejrang K Marak u la ai ka jingujor sha ki pulit ba ha ka por 2 baje mynstep jong ka 28 tarik Naiwieng, ki runar bym lah ban ithuh ki la tuh ïa ka arshaka ka jong u, kaba don ïa u registration number AS18-P-1384 na ka jaka sah ka jong u, kaba don ha Haluapara ha North Garo Hills.
Ha kaba ïadei bad kine ki kam shah tuh, na ka liang jong ki pulit hadien ba ki la ïoh pdiang ïa ki jingujor, ki la pynlong ïa ka jingtohkit na ka bynta ban lap ïa ki jingshisha bad ban thwet ïa ki runar kiba donkti ha kane ka kam.
