Shillong, Nohprah 02
Ka Shillong Lajong FC ka la wanphai biang sha ka kyrdan ba ha khlieh duh jong ka OC Blue Shillong Premier League 2024 hadien ba ka la lah ban pynliem noh ïa ka Sawmer SC da 4-1 kol ha ka Lah Sngi U Blei ha SSA Stadium kaba ha First Ground, Polo, katba Laitkor SC bad ka Langsning FC ki la ïakhaid khlem don ba thep kol.
Ha kane ka jingïakhun ka Lajong ka la pynkhih jar nyngkong eh lyngba u Yohaan Benjamin (58) bad ïa ka kol ba ar la ïarap pynthep da u rangïalehkai ka Sawmer u Ricky Chyne (62). Kane ka kynhun ka la thep biang lyngba penalty ba la shut da u Babysunday Marngar (72) bad ïa ka kol basaw bad kaba khatduh la thep da u Mebannangkiew Thabah (88). Katba u Orestar Sad (77) u la lah ban thep lyngba ka penalty na ka bynta ka Sawmer.
Kam shym la dei ka jingïalehkai kaba bha tam na bynta ka Lajong, hynrei ka la pyndep ïa ka kam ryngkat 13 poiñ ban ïaryngkat bad ka Mawlai SC kaba la tam lyngba ka jingïapher kol (+10 & +8) wat la ka Mawlai ka dang don ïa ka jingïakhun ba kan pyndep. Ka Sawmer ka la hiar sha ka kyrdan balai ryngkat 11 poiñ. Ka la ïalehkai kham bun ki jingïalehkai ban ïa kiwei pat ki kynhun bad mynta ka sngi ka dei ka jingïalehkai kaba hynñiew.
Ka jingïakhun kaba la sahkut ha ka 45 minit ba nyngkong ka la pynlong ïa u Yohaan ban shah khanglad ha u rangapkol ka liang pyrshah u Pyrshangbanbha Dkhar bad u Shanmeiaki Warlarpih ka Sawmer u la khyrwit ïa ka kol da ka free-kick.
Dei ha ka kylla miet ba u Yohaan u la lah ban thep ïa ka kol kaba nyngkong. Tang hadien saw minit, u Babysunday u la don ha ka liang ka diang bad u la thep ïa ka diagonal pass sha uwei u paralok jong u hynrei uwei u defender ka Sawmer u la ïoh ïa ka kabu kaba biang, hynrei u la shah khanglad noh ha u rangïalehkai ‘dien ka Sawmer.
Ka jingstet jong ka jingïalehkai ka long kaba khlem sangeh bad ka Lajong kam shym la lah ban pynsuki ïa kane ka jingïakhun. Kawei ka kabu ksiar ka la wan lyngba u Babysunday, hynrei u Pyshangbanbha um shym la lah ban pynurlong. Ka dei ka penalty kaba la plie lad ruh khyndiat ïa ka Sawmer, da ka jingshah pynur u Aibanraplang Dohling na shadien haba rephri u la la kdew beit sha ka penalty. U Orestar Sad u la pynphai kylla ïa kane da kaba suk, hynrei kam shym la don satia ban wanphai biang na ka bynta ka kynhun jong u namar ba ka Lajong ka la ïoh ban thep ïa ka kol kaba khadduh lyngba u Mebannangkiew.
Haba phai sha kawei pat ka jingïakhun hapdeng ka Laitkor bad ka Langsning ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba bang bha hynrei kim shym la lah ban khur ïa ki lai point.
Kane ka jingïakhaid ka la pynlong ïa baroh ar tylli ki kynhun ban kamai mar 7 point ha kaba ki la ïaryngkat bad ka Nongthymmai SC, kaba don ïa ka jingïalehkai ha kti. Watla ki don ïa ka jingïapher ha ka jingthep kol, hynrei ka Langsning ka la tam ïa ka Nongthymmai, kaba pynliem ïa ka Laitkor. Kumta ka Langsning ka la wan ha ka kyrdan ba san, ka Nongthymmai ha ka kyrdan ba hynriew bad ka bad ia ka Laitkor ha ka kyrdan ba hynñÏew.
Ka jingïalehkai ha ka Sngi Ba-ar kan long hapdeng ka Ryntih FC pyrshah ïa ka Nangkiew Irat SC ha ka por 2:30 janmiet.
