Shillong, Nohprah 02
Ka Mawlum Tyrsad SC ka la rung sha ka semi final ha ka First Division Football Tournament 2024 ba la pynïaid da ka Tyrsad Area Sports Association (TASA) hadien ba ka la pynliem noh ïa ka Kyrphei SC da 2-1 kol ha ka Lah Sngi U Blei.
Ha kane ka jingïakhun kaba la long ha madan ïalehkai Tyrsad, baroh ar kynhun ki la pyrshang ban ïakhun tyngeh naduh kaba sdang ha kaba ki la ïoh ïa katto-katne ki kabu kiba biang. Hadien shiteng kynta ka Mawlum ka la ïoh ban pynkhih jar nyngkong eh lyngba u Badondor Khongsit (36). Hadien katto-katne por ba la bteng ïa ka kylla miet, ka Mawlum ka la thep biang ïa ka kol ba ar lyngba u Wadlang Jaba (65). Hadien 2 minit ka Kyrphei ka la lah ban pynphai kylla lyngba u Batskhemlang Nongbet shwa ba kan mad ïa ka jingshah rem.
Haba phai sha kawei pat ka jingïakhun ba ar, ka Thaiñthynroh SC ka la jop ïa ka Rangshangkham SC lyngba ka shi kol ba la thep da u Banshngaiñ Kharryngki (76).
Ka jingïalehkai jong ka Third Division ha ka Sngi Ba-ar kan long hapdeng ka Kyiem SC pyrshah ïa ka Rampna SC (11:40AM), kumjuh ka Nongbri SC ïa ka Lyngdoh Phanblang SC (1:30PM), katba ha ka Second Division ka Pyndenumbri SC kan ïakynduh pyrshah ïa ka Nongwah SC (3PM).
