Islamabad, Nohprah:
Katkum ka jingbuh jingkheiñ jong ka tnat ïada ka Pakistan, la ong ba ki la don kumba 245 ngut ki briew, kynthup ia 68 ngut ki bor pahara ba ka Pakistan ka la duh ei noh ha kiba bun tylli ki kam thombor jong ki lehnoh bad kumjuh ha ki jingiakynad ha kylleng jong ka katei ka ri ha u Naiwieng. Kane ka long katkum ka jingbuh jingkheiñ jong ka tnat Pakistan Institute for Conflict & Security Studies (PICSS) ba ka la pyllait bad pynbna paidbah ha ka Sngi U Blei. Kitei kiba khlad ki kynthup ruh ia 127 ngut ki dkhot jong kynhun lehnoh bad 50 ngut pat kiba dei ki ‘riew paidbah.
Namar la ong ba u bnai Naiwieng u long u bnai uba shyrkhei tam ia ka Pakistan hadien jong u Nailar ba haduh 254 tam kiba iap, kynthup ia 92 ngut ki riew paidbah, 108 ngut ki dkhot lehnoh bad 54 ngut ki bor pahara, kiba khlad ha ki jingjia thombor bapher kiba la jia ha utei u Nailar.
Hynrei ban ianujor ia kiwei pat ki bnai ha une u snem, u Naiwieng u long u bnai ba shyrkhei tam ba ka Pakistan ka la ap jingma na ki kam thombor jong ki lehnoh, ha kaba 62 ngut ki bor pahara ki la kyllon iap ha kiba bun tylli ki jingjia thombor ba la wanrah da ki kynhun lehnoh jong ka Pakistan.
