Shillong, Nohprah 03
Ka Ïingbishar kaba halor jong ka Jylla (Meghalaya High Court) ka la bthah ïa ki bor ba dei khmih ban pyntikna ba ka jingthung dieng kan urlong kumba la pynpaw da ka NHIDCL ha ka kot jingpynshisha (affidavit) kaba la phah sha Ïingbishar bad ba ka jingshna ïa ka surok Shillong-Dawki ka dei ban long katkum ki hukum kiba la pynmih da ka Ïingbishar bad pyndep noh ïa ka surok kham kloi katba lah.
Ka Ïingbishar ka la pynmih ïa kane ka hukum haba shim bishar ïa ka mukotduma (PIL) kaba la mudui ha Ïingbishar, bad la bishar da ki ar ngut nongbishar kita, u Chief Justice, I P Mukerji bad Justice, W Diengdoh halor ka jingpom ïa ki 103 tylli dieng na ka bynta ka jingshna ïa ka surok Shillong-Dawki.
Na ka liang u Dr. N. Mozika, Deputy Solicitor General of India (DSGI) uba ïasaid na ka bynta ka NHIDCL u la pynsngew lyngba ka kot jingpynshisha kaba mynta ka sngi (2 tarik Nohprah, 2024) ha kaba la batai ba ka NHIDCL ka la dep shim jaka kumba 16.107 hectare ha Nongumiang, West Khasi Hills district, Meghalaya ha ka dor T. 1,98,43,824 hadien ba la ïoh jingmynjur na ka Sorkar Meghalaya ha ka 03.02.202l.
Hadien kane, la aiti ïa ka jaka sha u Divisional Forest Officer, Social Forestry and Territorial Division, West & South Khasi Hills, Meghalaya ha ka 25.02.2021 na ka bynta ban leh ïa ki kam thung dieng (compulsory afforestation).
Shuh shuh la ong ba ka NHIDCL ka la siew T. 3,87,11,297 na ka bynta ka CAMPA Fund (Compulsory Afforestation Management and Planning Authority Fund) lyngba u Divisional Forest Officer, East Khasi Hills & Ri Bhoi (T) na ka bynta jinglut kaba ïadei bad Compulsory Afforestation na ka bynta ka jaka kaba 16.107 hectare ban leh kum kam thung dieng bad kiwei kiwei ki kam.
