Ngi don ban pynsngew hangne lyngba ine i jingthoh jong ngi, da ka jingsngewkhia ka mynsiem, bym banse, shaphang kane ka surok New Shillong ba la shna da kine ki Company DHAR ba la pawnam hangne ha Ri Khasi Jaiñtia jong ngi, katno ka long ka jingsngew heh mynsiem haba don kum kine ki paradoh parasnam kiba lah ban wanrah burom bad ban ai kam ai jingtrei ïa ki paid trai ri trai muluk ka da long shisha ka jingmyntoi ïa u rit u ria u duk u jynjar khamtam ïa kiba shu im ja ha kaba shu bylla sngi. Hynrei kum ki nongshong shnong jong kane ka thaiñ, ngim lah ban mutdur, tip tang sha ngi shane ne shawei-shawei ruh ki mad lang kumjuh ? Kumba long mynta ka surok ba la bha lah plih haduh katne katne ka la pynsuk shisha ïa kiba don kali, nalor ba la biang lut wat ki dak, ki khnam ba kdew, ïa ka jing-long jingkhun, ki signal surok kaba la pynaram ïa uba bun balang kiba leit ba wan da ki motor la mynmiet ne mynsngi. Hynrei ha kum kane ka khep sngew lyngngoh ngaiñ ban ong ba kane ka surok ka la wanrah ki jingkyrkhu tang ïa u badon ba em, hynrei ka jynjar jyntrah ïa u baduk ba bylla bym don lad ban thied kali, ka wanrah ruh ka jingtim briew bakhraw ïa ki nongïaid kjat ba hap pyndonkam ïa kine ki Footpath, namar ynda la poi ha kine ki jaka ba thep ïa ki hume pipe ne Culvert hap ryngkoh biang sha surok bah, namar ïa ka thliew baheh bad ïar ba jylliew ym shym la tap satia shu ïeh rynghang mynta la katto katne snem kum kaba pynapshrip da ka LIEWLEP syndon, katno ka long kaba ima shisha yn kiar liewlep ne yn kiar kali, ki nongïaid lynti ki dap da ka jingsyier mynsiem, kham syier palat ki bapli ki kmie ki kpa ba btin ïa la ki khunrit ban leit on, leit shaw skul. Ah ! Lada long kumno kumno ruh ngi kyrpad ïa u Contractor ba un wan ïaid lynti lem shisien, ban bishar da lade, hato ka bit ka biang mo ban ïeh, ban leh bym suitñiew haduh katne? Ynnai ïa ong ïa kita ki stad surok Engineers, kiba haba kin ïohi ïa kine ki jinglehbeiñ, jingbymsuitñiew (negligence) ki hap ban khapbrip ngaiñ namar imat kim don iktiar eiei ban kyntu ïa u Contractor ban buh jingshngaiñ ïa u paidbah ba leit ba wan da kine ki Footpath. Ha ka jaka ban pynbha ïa ki lynti ïaid u shnong u thaw, la shna pynban da ki kyndon (steps) rud surok bad thung phlang, thungdieng, ker da ki kriah, shano kine ki don mynta ? Tang 3 – 4 bnai ym ïohi syrngiew shuh, la shu rat shah phanang lut sha nala, kane la sakhi tang ha Mawkasiang ter ter haduh siejiong, Tynring tip shawei ym lah ong aiu la jia. Ha Gate St. Francis School la buh speed breaker (stripe) tangba la shu khappit palat, thik tang haba siang rong, katba sharud la shu ïeh kumnto, kat ka Truck Pickup ka dang lah ban ïaid speed kumjuh, hato kane ka jingbuh speed breaker kam mut mo ban shngaiñ ki khynnah skul ne kiba ïaid kjat namar hangne la jia ka accident ka Bus School bad ka truck saw shaka, la don ruh ka jingshah sangeh briew ha kane ka jaka. Kine ki thliew ba ïeh rynghang la don kiba hap shapoh, tangba ki long kumno ym tip, namar la shu sngap la ka sngap. Namar kata la sngewdei ban ai jingmut ïaki Master Roll ba sumar pynkhuid ïa kane ka surok ban keiñ noh ka pynkhuid ïa kine ki lynti ïaid kjat, bha ba ïeh sañium kumto mat san ei u Sohbyrthit ban ym khring briew ban pyndonkam ïaki, namar khamtam mynsynia haba thaba kali ki bun ki ban dang hap ha kane ka apot, ioh kdiah ei, pait shyllang ne poi shaduh ka iap ka duh mano ban tip. Hangne hajan St. Francis leilei ka thliew jylliew phew phut. Sa da ïa wan peit ïa bishar lem ma phi kiba sngewkhia lem (concerned) ym ba shu pynheh ne shu nang ang ma ngi. Na ki dak ki shin ba paw ynnai da batai, don ki signal ba la dkut thui thui khamtam hangne ha khmat madan Football shnong Siejiong, kito ki post bat tah Radium, ki khnam, la bun ba jah wat kiba sah ruh la shu ïa ïeng kyrbeit thiah hangne la kat uto uba buaid kyiad step. Na kata ka daw phin sngewthuh haduh katno ka long Speed bad rough ki nongñiah kali bad ka surok ruh kam ju thylli kali (ply) shuh wat tang 1minit la mynmiet ne mynsngi ba ka buh jingma shaba palat lada ym biang ki footpath. Ha kane ka thaiñ jong ngi ngi ju ïohsngew ba don ki Seng Bhalang kum ki K. S. U., HANM sngewbha ngi kyrpad ïa phi ba phin ïa pynsngewlem ïa kine ki jingeh na ka bynta ka bha ka miat uba bun balang, u paidknup paidtrap bad kumjuh ki hep ba leit skul wan skul, ngin ym ïa ap tad haduh ba da jia kiei kiei kiba pynpangnud, ne kynphuit kynshi dier por. Imat tang ba dei ka Company trai jylla, bad ka surok ruh jong ka Sorkar (PWD) ki Dorbar Shnong kim ktah tuklar eiei, hynrei ngin ym klet ban kynmaw ba ka apot, ka iap ka im hi kan ym dei eh ïa kiba nabar shnong hynrei ïa ngi nyngkong ki paid nongshong shnong ba don ha shi lynter kane ka surok.
Bah S. Mylliem Pdah, Mawkasiang
