Kyiv, Nohprah:
U President ka Ukraine- u Volodymyr Zelensky ha ka Sngi U Blei u la ong ba ka Ukraine ka donkam ia ka jingkyrshan kaba pura na ka kynhun NATO bad ka dang donkam bun ruh ki tiar ïakhun ba kan lah ban ïada ialade katba dang pynap ia ka jingiakren iasuk bad ka Russia.
U Zelensky u la kren ia kane tang hadien ka jingiakynduh jong u ia u khlieh ba thymmai ka EU- u Kaja Kallas bad u heh ka EU Council- u Antonio Costa, kiba la leit ban jurip sha Ukraine ban pyni ia ka jingkyrshan jongki sha katei ka ri.
Kumta u la ong ruh ba ka Ukraine ka donkam beit ban ioh long ka dkhot ba pura jong ka NATO khnang ba kan lah ban ïada ialade bad ki ri ka NATO baroh lang kin lah ban ai jingkyrshan bad ban ïada lem ia ka Ukraine lada ka shah thombor ne shah hiar thma ha ki ri kiba khlaiñ bor kum ka Russia.
Namar la ong ba ka Ukraine kan hap ban mad ia ka aïom Tlang kaba jynjar namar ka Russia ka ialeh beit tang ban pynjulor ia ki shlem pynmih bor ding jong ka Ukraine khnang ba ki kam ki jam jong ka Ukraine kin pulom lut.
Dei na kane ka daw ba u Zelensky u la pynpaw ia ka jingdonkam kyrkieh jong ka Ukraine ban ioh ia ka bynta kaba kongsan ha katei ka thup jong ki ri kiba don hapoh ka kynhun NATO, khnang ba lada ka jingiakren bad ka Russia kan long kumno- kumno ruh, ka Ukraine ka la lah ban pyntikna ia ka jingshngaiñ jong ki paidbah jongka.
Kumjuh ruh haba iadei bad kane, u Costa u la ong ba ka European Union kan ai ka jingkyrshan ba ratbah ia ka Ukraine ha man ki sien jam bad ki rai ba ka shim namar ka Ukraine kam banse ban ialeh pyrshah ia ka Russia naka bynta ban ïada ia u pud- u sam jongka.
Haba iadei bad kane, u President ka Russia pat u Vladimir Putin, u la byrngem ba un leit ban ther da ki ‘namding ‘Oreshnik’ sha ki ophis sorkar jong ka Ukraine hadien ba ka US ka la aibor ia ka Ukraine ba kan pyndonkam ia ki ‘namding ‘ATACMS’ ba khlaiñ bor jongka naka bynta ban leit hiar thma pyrshah ia ka Russia.
Shuh shuh ruh la ong ba, ha ka Sngi U Blei, kawei ka drone na Russia ka la leit ban pynhap ia u bom ha kawei ka bos ha ka thaiñ South jong ka nongbah Kherson jong ka Ukraine ha katei ka sngi, ha kaba 3 ngut ki la khlad hashen ha katei ka jingjia. Kumjuh ruh ka tnat shipai Russia ka la kam trai ba ka la ioh ban kurup ia 2 tylli ki shnong ba khappud jong ka Ukraine sha ka phang East jong ka Ukraine ha katei hi ka sngi.
