Shillong, Nohprah 03
U MLA ka Liang Pyrshah na ka seng All India Trinamool Congress (AITC), Bah Charles Pyngrope u la pynpaw ka jingbym ïahap ïa kata kaba ki ong ka ‘VIP Culture’ lane ban kheiñ kyrpang ïa ki heh ki haiñ.
Haba kren ha ka sngi Ba-ar u la ong ba ka ‘VIP Culture’ kam dei ban don, ym dei tang ha Meghalaya ne Shillong, hynrei hangno-hangno ruh kam dei ban don.
U la ong ba ki MP, MLA bad MDC ki dei kiba la jied da ki paidbah, namar kata kumno kin kam ba ki dei kita ki ‘VIP’ hakhmat ki paidbah kiba jied ïa ki ha kato ka shuki.
“Ban ai na ka bynta kaei kata ka ‘VIP Culture’, ki paidbah ki dei ki ‘VIP’, ngi dei tang ki shakri jong ki paidbah”, la ong u Bah Charles.
Haba kylli, u la ong ba kane ym lah ban ong ba ka dei ka jingpyndonkam bakla, hynrei la ai tang da ki jingpynbna ba la pynmih da ka Sorkar, ha kaba u la pynpaw ba ïa kane donkam ban khmih bniah biang.
Haba pynpaw ka jingbym ïahap ïa ka jingshah ktah ki paidbah na ka jingdon ka ‘VIP Culture’, u Bah Charles u la ong ruh ba ki don ki kyndon bad ki rukom pynïaid jong ka Sorkar halor kane, ban ithuh ïa ki ‘VIP’, hynrei kane kam dei ban pyndonkam bakla haduh ban pyndik ïa ki paidbah.
Lah ban pynpaw ba ka jingdawa pynduh ïa ka jinglong kyrpang lane ka ‘VIP Culture’, ka la jur bha na kiba bun balang hapoh ka Jylla, khamtam hadien ka jingkhlad jong uwei u samla ha surok Shillong Bypass hajan ICAR ha ka janmiet 15 tarik Naiwieng ha ka lynti ba u dang leit sha Cherry Blossom Festival, ha kaba la kynnoh ba utei u samla u la khlad hadien ba ka kali pulit ba synran ïa u Myntri Sorkar ka la rat ïa ka ar shaka haduh ba un da khlad hashen, katba ka kali kaba rat ka la ïaid beit.
Hadien ba mih kane ka jingdawa bad ka jingkhohñioh na ki paidbah, ka Myntri jong ka Sorkar Jylla ka Dr M Ampareen Lyngdoh ka la ïathuh ba ka la sangeh ban pyndonkam ïa ka siren mynta la shitaïew haba ka leit ka wan, wat ha ka por ba dheng kali.
