Wat la ym pat tip ïa ki tarik ha u snem 2025 ban pynlong ïa ka ilekshon MDC sha ki ar tylli ki ïingdorbar, kita ka Khasi Hills Autonomous District Council (KHADC) bad Jaiñtia Hills Autonomous District Council (JHADC) hynrei ka lyer na ka bynta kane ka ilekshon ka la sdang ban beh kumjuh ban hui-hui ha ki seng saiñpyrthei kiba la pynkhreh na ka bynta ban mih madan lyngba ki kyrtong ba kin sei ban pynïakhun ha kane ka ilekshon. Haduh mynta, dei tang ka Voice of the People Party (VPP) kaba la dep ban sei bad pynbna kyrtong ha baroh 29 tylli ki konstitwensi jong ka KHADC bad kumjuh 29 tylli ki konstitwensi jong ka JHADC da ka jingkyrmen ba kan ïoh ban synshar hi ha kine baroh ar tylli ki district council.
Ka ilekshon MDC ha ka jingshisha ka la dei ban long ha u bnai Rymphang 2024. Hynrei, namar ba ka don kata ka jingpynbeit thymmai ïa ki konstitwensi da ka Delimitation Committee ba la thaw da ka KHADC bad JHADC, ïa kaba la ïoh ruh ka jingmynjur na u Lat ka Jylla, kumta la hap ban pynjlan noh ïa ka samoi treikam jong ki MDC sa shisnem. Ka khubor ka ong ba ka ilekshon MDC ka lah ban long ha u bnai ba ar jong u snem ban wan. Ka jingsdang ban leit lum leit lang ïa la ki briew da ki seng saiñpyrthei ruh ka la sdang bad kumjuh ka jingpynpaw ïa ki kyrteng jong ki kyrtong kiba kwah ban pynïakhun na ki konstitwensi bapher-bapher. Lah ban ong ba kane ka ilekshon MDC ba mynta ka ban sa long, kan long kaba itynnad bad kaba shongshit bha na ka jingdon jong ka VPP hadien ba ka la dep ban ïoh ka jingjop kaba heh bha ha ka ilekshon MP kaba dang shu dep.
Wat la ka VPP ka la jop kput ïa ka ilekshon MP ba dang shu dep bad khamtam lei ban sar jingjop na ki 32 tylli ki konstitwensi napdeng ki 36 tylli kiba don ha Rilum Khasi Jaiñtia, ki don bun pat ki Nongïalam na kiwei ki seng saiñpyrthei ki ong ba ka ilekshon MP bad MDC ka la ïapher bak-ly-bak. Ka jingshisha halor kane kan sa paw ynda la pynlong ïa ka ilekshon MDC ban lap shisha haduh katno kata ka ilekshon MP na ka ilekshon MDC kan pher. Ngi la ïoh ban sakhi mynta ba ki seng saiñpyrthei bapher bapher ki la khih khohreh ban lum ban lang ïa la ki nongkitkam bad ban ïaleh ban pynkhlaiñ ïa la ka jong ka seng bad ban hiar sha ki shnong ki thaw ban leit pynpaw pynsngew ïa la ka nongrim bad jingthrang ban ïakhun ha kane ka ilekshon. Wat la ka VPP ka la dep pynbna lut ïa ki kyrtong baroh ban ïakhun ïa ka ilekshon MDC, hynrei kiwei pat ki seng saiñpyrthei i kumba ki dang ïohthiah ne ki dang ap kmang ïa ka por kaba biang. Hooid ki don ki seng saiñpyrthei wat la kim pat pynbna pura ïa la ki kyrtong da ka rukom pynbna kaba dei hynrei ki la dep ban pynpaw pat sha ki paidbah ïa la ki kyrtong ha ki katto katne ki konstitwensi.
Ngi la ïohi ba kum ka UDP bad Congress ruh ki la sei ïa la ki kyrtong ïa kaba ki la dep ruh ban pynpaw sha ka pyrthei ha ki katto-katne ki konstitwensi ban pynïeng ha kane ka ilekshon ban wan. Kan long shisha kaba itynnad bad imat ka ban kham pher na kiwei pat ki ilekshon MDC kiba la dep, namar lada peit ha ki ‘comment section’ ne ki rynsan kynthoh ha ki ‘social media’ te i kumba ka jingjop ka la dei lypa ïa ka VPP. Haduh katno kane kan lah ban urlong. Hato kita kiba kynthoh ha ki rynsan social media, kin dei shisha ka bor ban lah pynkylla ïa ka jingmut jingpyrkhat jong u paidbah? Tang ka por ka ban batai. Ka Congress kaba dei ka seng kaba khlaiñ bha ha ki por ba la leit, mynta ka la kynjah jar hadien ba ka la don sa tang uwei u MLA. Pynban imat ha kane ilekshon MDC kane ka seng kan sa lah ban khie-khlieh biang kumba ka paw na ka jingïakren sharum-shaneng jong ki paidbah. Kumta mynta kan shong ha ki Nongïalam jong ka pat kumno ban sei ïa ki kyrtong bad kumno ban leit pynsngew sha u paidbah.
