Shillong, Nohprah 03
Ka Mawkhar-Pynthorumkhrah konstitwensi kaba hap ha sor Shillong ka lah ban dei napdeng kawei ka konstitwensi kaba kham itynnad na ka bynta ka jingïakhun ïa ka ilekshon sha ka Khasi Hills Autonomous District Council (KHADC). Namar katkum kaba paw pyrthei mynta ba ka jingïakhun kan long para marwei hapdeng u kyrtong ka Congress uba dei u MDC ba mynta bad kum u Deputy CEM ka Khasi Hills Autonomous District Council (KHADC) Bah Pynshngaiñ N Syiem pyrshah ïa u kyrtong ka Voice of the People Party (VPP) Bah Strong Pillar Kharjana uba dei ruh u President ka VPP North Shillong.
Katkum ki khubor kiba la ïoh lum na ki nongkitkam ka NPP, la sngewthuh ba kin ym pynïeng kyrtong ha kane ka konstitwensi na ka bynta ka ilekshon MDC namar kim ïoh ïa ki briew kiba biang, katba ka UDP la sngewthuh kan pynïeng ïa u kyrtong hynrei haduh mynta kam pat lah ban pynbna ïa ka kyrteng.
Lada ka NPP kam pynïeng kyrtong kaba mut ba ha Mawkhar-Pynthorumkhrah konstitwensi kan long para marwei hapdeng u Bah Pynshngaiñ N Syiem uba dei u MDC ba mynta ka Congress pyrshah ïa u nongïalam ka VPP Bah Strong Pillar Kharjana.
Kum ban shu pynkynmaw, u Bah Strong Pillar Kharjana u la pan tiket na Jaïaw konstitwensi hynrei la ai tiket pat ban ïakhun na Mawkhar-Pynthorumkhrah konstitwensi namar ha Jaïaw la ai sha u Bah Denzil Chen.
Ka jingai tiket ka VPP ïa u Bah Strong na Mawkhar-Pynthorumkhrah ka lah ban dei ba u dei u President ka VPP North Shillong konstitwensi namar ka Mawkhar ka hap sha North Shillong ha ka MLA, katba ha ka MDC pat ka Mawkhar bad kiwei ki shnong ki synroplang bad ki shnong kiba hap sha Pynthorumkhrah.
Kumta jingïakhun kan long kaba kham itynnad namar ïa u Bah Strong Pillar Kharjana yn kyrshan da u MLA ba mynta u Bah Adelbert Nongrum uba la jop arsien na North Shillong, katba u Bah Pynshngaiñ N Syiem uba dei u kyrtong ka Congress un hap ïakhun marwei.
Wat la ka Sorkar Jylla kam pat ai ksai lano ban pynlong ïa ka ilekshon MDC ha KHADC bad JHADC hynrei ki seng saiñpyrthei kiba don ha ka Sorkar naduh ka NPP, UDP, HSPDP ki la pynkhreh shaid-shaid ban wad kyrtong, lait noh ka VPP kaba la dep pynbna lut ïa ki kyrtong ha kane ka ilekshon MDC.
