Itanagar, Nohprah:
Ka Sorkar Pdeng ka la mynjur T.28,229 klur na ka bynta ban shna ïa ka surok bah kaba 1,637 km jong ka Arunachal Frontier Highway kaba pynïasoh ïa ki 12 tylli ki distrik jong ka jylla lyngba u Line of Actual Control (LAC) ha khappud India-China, la ong uwei u heh ophisar.
Kane ka projek kaba thmu ban tei ha ka jinglut kaba la antad ban long T. 40,000 klur la ïohi kum ka sienjam ban ïakhun pyrshah ïa ka jingleh donbor jong ka China ha Arunachal Pradesh, nalor ba kan ïarap ïa ka roi ka par ha ka imlang-sahlang jong kane ka jylla khappud.
Ïa kane ka surokbah la shna ha khappud ‘India-Tibet-China-Myanmar’ bad kane ka projek surok kan jngai kumba 20 km na ki khappud LAC bad ki khappud jong ki ri ka pyrthei.
Kan sdang na Bomdila bad kan ïaid lyngba ki sor Nafra, Huri bad Monigong, kiba khamjan bad ka LAC lane u McMahon Line, bad ki pynkut ha Vijaynagar hajan khappud India bad Myanmar.
“Ka sorkar pdeng ka la mynjur T. 28,229 klur na ka bynta ka surokbah jong ka Arunachal Frontier Highway, ka ban pynïasoh ïa ki 1,683 tylli ki shnong. Ïa ka surok bah jong ka ri kaba dang shna pynïakhlad bad u laiñ MacMohan yn pyndep ha u snem 2027,” la ong u Chief Engineer jong ka Border Roads Project Organisation (BRO) u Brahman, u Subhash Chandra Lunia.
U la ong ba ka jingtrei ka dang ïaid shakhmat na ka bynta ban shna ïa ka surok kaba 198 km (Tato-Tuting) jong ka Arunachal Frontier National Highway-913.
Hadien u snem 2014, ka mang tyngka na ka bynta ki kam jong ka BRO ha ki jylla bapher bapher la pynkiew ar shah ïa ka jingmang pisa na ka bynta ban pynroi bad maramot ïa ki surok haba ïanujor bad ki snem ba mynshwa, la bynrap u heh sorkar.
Haba pynpaw ba ka jingtrei ka dang ïaid shakhmat halor ki projek kiba hap hapoh ka Brahmank Project ha Arunachal Pradesh, u Lunia u la ong ba ka jingshna bad maramot ïa ki jingtei surok ka dang ïaid shakhmat ha Siang, Upper Siang, West Siang bad Shi-Yomi ha ryngkat ka jingmaramot ïa ki saw tylli ki surok ha ka Dhemaji distrik jong ka Assam.
Ha u snem 2022-23 bad 2023-24, ka Brahmank Project ka la shna ïa ka jingkieng Span Arch kaba 100 metre ha ka wah Siom ha sarok Along-Yingkiong. Ïa ka jingshna ïa ka jingkieng Siom la pyndep ha ka por kaba long 180 sngi bad la plie na ka bynta ka jingïaid jong ki kali, u la ong.
U Lunia u la ïathuh ruh ba naduh ka sngi ba la seng ïa ka Brahmank Project haduh mynta ka sngi, la lah ban shna ïa ki 17 tylli ki surok, ha kaba ka jingjrong jong ki baroh ka long 496 km.
Ryngkat bad kane, la pyndep ruh ïa ka jingshna ïa ki 42 tylli ki jingkieng ba neh bad 11 tylli ki jingkieng Modular.
Une u heh sorkar u la ong ruh ba ka BRO ka ju don hakhmat eh ha kaba shna ïa ki surok/jingkieng ha ki jinglong jingman kiba bha bad kiba sniew ha kine ki bun snem ba la dep ha ka jylla.
Hapoh ka Brahmank Project, ka BRO ka thmu ban pynïoh ïa ki lad pynïasoh ha man la ka por ïa ki shipai kumjuh ïa ki paidbah.
