Shillong, Nohprah 03
Ka President jong ka Ri, ka Droupadi Murmu ka la sam ïa ki khusnam na ka bynta ka jingpynkupbor ïa ki briew kiba don jingduna ha ki dkhot met jong u snem 2024 ha New Delhi, kaba la long ha ka sngi Ba-ar ha ka jingrakhe ïa ka International Day of Persons with Disabilities.
Haba ai jingkren ha ka jingïalang, ka President ka la ai khublei ïa baroh ki nongjop khusnam. Ka la ong ba kine ki khusnam ki don ka bynta kaba heh ha ka imlang sahlang. Da kaba bud ïa kine, kiwei kiwei ki briew bad ki kynhun ki lah ban jam shaphrang ban pynkup bor ïa ki briew kiba don jingduna ha ki dkhot met. Haba kren shaphang ka phang pdeng jong ka International Day of Persons with Disabilities mynta u snem ‘Amplifying the leadership of persons with disabilities for an inclusive and sustainable future’, ka President ka la ong ka jingkyntiew ïa ka jingseng kam lajong hapdeng ki briew kiba don jingduna ha ki dkhot met, ka jingkyntiew ïa ki sap treikam jong ki, ka jingplie lad ïoh kam, ka jingthied ïa ki tiar jong ki, bad ka jingplie ki lad ban pynïaid ïew ïa ki mar jong ki kan pynïar shuh shuh ïa ka sap long nongïalam jong ki.
Ka President ka la ong ba ki briew baroh ki dei ban pynthikna ba ki briew kiba don jingduna ha ki dkhot met ki shongsuk bad ki ryntih ka kyrdan. Ka jingwanrah ïa ka jinglong jingman kaba lait na ki jingwit ka dei ban long ka bynta ba kongsan ha ka imlang sahlang. Dei tang kum kane ka jait imlang sahlang ha kaba ki briew kiba don jingduna ha ki dkhot met ki ïoh ïa kijuh ki jingshakri bad ki lad kaba lah ban ong ba ka dei kaba don ka jingsngewlem.
Ka President ka la ong ba ka jingduna ha ki dkhot met kam dei ka jingduna. Ka dei ka jinglong kaba kyrpang. Ki briew kiba don jingduna ha ki dkhot met ki donkam ïa ka jingsngewlem, ym ïa ka jingisynei, ki donkam ïa ka jingsngewlem, ym ka jingleh bha. Ka imlang sahlang ka dei ban pynthikna ba ki mad ïa ka jinglong ryntih, ka burom bad kiwei ki dkhot ha ka imlang sahlang.
Ka President ka la ong ba ka lad ban trei, kum kiwei kiwei ki briew, ka wanrah ka jinglong kaba skhem bad ka jingim kaba don jingmut ha ki briew kiba don jingduna ha ki dkhot met. Kumta, ka jingim jong ki lah ban kiew lyngba ka jingïoh kam, ka jingseng kam bad ka jingpynkupbor ha ka ïoh ka kot.
