Shillong, Nohprah 03
Ka shi kol ba la thep shwa ban wai ka jingïakhun lyngba u Zothanpuia Bawihtlung ka la biang pura ïa ka Nangkiew Irat SC ban pynliem noh ïa ka Ryntih FC da 1-0 kol ha ka lympung ïalehkai Shillong Premier League 2024 ha ka Sngi Ba-ar ha SSA Stadium kaba ha First Ground, Polo.
Une rangïalehkai u la lah ban thep kol lyngba ka free-kick ha ka minit kaba 90+2 ha kaba u rangapkol ka Ryntih u Eric Nongkhlaw um shym la lah ban kyrda na ka jingshah thep kol.
Lyngba kane ka jingjop ka la pynlong ïa ka Nangkiew Irat ban jam sha ka kyrdan basan ban ïaryngkat mar 9 poiñ bad ka Rangdajied United FC kaba dangsah ïa ka jingïalehkai ka ban wan. Kine arliang mamla kim pat ïakynduh pyrshah, hynrei ka Rangdajied ka la tam lyngba ka jingïapher kol (+5 la 0). Kumba ka long mynta ka Ryntih ka dang ïai sah ha ka kyrdan shatrai jong ka miej kheiñ poiñ da kaba ïoh 3 poiñ bad kane ka dei ka jingshah rem kaba hynriew sien kynthih.
Ha katei ka jingïakhun ka Ryntih kam shym la lah ban thaw ïa ki lad ki lynti ban ïoh thep kol ha baroh ka jingïalehkai. U kapten Dameki Khongstia u la trei palat por ha ka bynta kaba shapdeng, hynrei u la hap ban shong noh na ka daw ka jingmynsaw bad kane ka la long ka jingduh nong kaba khraw ïa kane ka kynhun.
Wat la ka la ïoh ar tylli ki kabu kiba biang ha ka kylla miet, hynrei u Leonardo Laloo um shym la lah ban pynurlong, katba u Basuklang Bina u la ïoh ïa ka kabu kaba biang, hynrei u la shah khanglad noh ha ki rangïalehkai ka Nangkiew Irat.
Na ka bynta ka Nangkiew Irat, ka jingeh na ka bynta u Eric ka la pynlong ïa une u nongapkol ka Ryntih ban duh ïa ka bol ha u Wallamsuk Nongkhlaw ha ka kylla step, hynrei kam long kaba suk ïa une u rangïalehkai, uba la wanphai biang sha ka jingïakhun hadien ka jingshah sospon ha ka jingïalehkai ba la dep namar ki yellow card.
Ha kaba kut ka bok ka la leit sha u Zothanpuia ban wanrah ïa ka jingjop lyngba ka free-kick kaba dei ruh ka kol ba nyngkong eh jong u ha kane ka samoi ïalehkai jong ka SPL. Wat la mynshwa u la thep saw kol na ka bynta ka Nongkrem SC ha ka Second Division 2024 shwa ba un leit ïasoh da ka ram sha ka Nangkiew Irat.
Kane ka lympung kan bteng biang ha ka Sngi Thohdieng ha kaba ka Nongrim Hills SC kan ïakhun pyrshah ïa ka Langsning FC ha ka por 11:30 mynstep, katba ka Nongthymmai SC ïa ka Nangkiew Irat ha ka por 2:30 janmiet.
