Shillong, Nohprah 03
Wat hadien 2 snem tam ka jingjia shah siat ïap jong 5 ngut ki mynsiem briew kaba la jia ha ka step jong ka 22 tarik u Naiwieng 2022 ha ka shnong Mukroh kaba hap hapoh ka West Jaiñtia Hills District ha kaba ki pulit bad ki bor pahara khlaw ka Assam ki la siat ïa 5 ngut ki rangbah jong katei ka shnong. Pynban la sakhi tad haduh kine ki sngi, na ka liang ki bahaïing-bahasem jong kitei 5 ngut ki dang ïai ap sah ïa kata ka jingbishar kaba hok.
Kum ban shu kdew hangne, na ka liang u Myntri Rangbah ka Jylla Meghalaya, u Conrad K Sangma ha u snem 2023 u la ong ba halor kane ka jingjia shah siat ïap jong 5 ngut ki mynsiem briew, la dep ban aiti ïa ka jingtohkit sha ka Crime Bureau of Investigation (CBI) bad ïa ka jingtohkit halor kane ka jingjia yn sa pyndep noh shen.
Katei ka jingjia ka la jia ha ka 22 tarik u Naiwieng 2022 hadien ba ki paidbah nongshong shnong ka Mukroh ki la mih na shnong ban leit dawa na ki pulit ka Assam ban pyllait noh mardor ïa ki nongshong shnong kiba la shah kem halor ka jingkynnoh ba ki la donkti ban tuh dieng. Ha kum katei ka por ka la mih ka jingpynibor hapdeng ki paidbah bad ki pulit ka Assam kat haduh u pud ba kan da mih ka jingïasiat bad ka jingduh noh ïa 5 ngut ki mynsiem briew.
Haba kren sha ki lad pathai khubor ha Shillong Press Club ha ka 3 tarik u Nohprah 2024, na ka liang ki nongïalam ka Dorbar Shnong Mukroh Pyllun, ki la ong ba na ka liang ka Sorkar Jylla ka la aiti ïa ka jingtohkit halor kane ka jingjia sha ka CBI bad kat haduh mynta ruh, ka jingtohkit halor kane ka dang ïaid shakhmat bad ka jingtohkit ruh ka dang long kaba suki bha.
“Na ka liang jong ngi kum ka shnong bad ha kajuh ka por ruh, na ka liang ka ïing-ka sem kaba la mad ïa kito ki jingeh, ngi dang ap khmih lynti ïa ka jingbishar kaba hok ba ngin ïoh lyngba kane bad kat haduh mynta ruh ka dang long suki ka jingtohkit”, ong kitei ki nongïalam shnong.
Kitei ki nongïalam shnong ki la ïathuh ruh ba na ka liang ka shnong lem bad ki bahaïing-bahasem jong kitei 5 ngut, ki ju tyrwa ïa ka kti kamon kti kadiang ha ka ban pynstet ïa ka kam bad ong ba ha kaba kut pat, ka shong sa ha ki kti jong ka Sorkar ba kan leh ïa la ka jong ka bynta.
“Ka sah sa ha ka Sorkar namar ngi shaniah ha ka Sorkar ba kan ai ïa ka jingbishar kaba hok hynrei haduh mynta pat kam pat poi shaei-shaei ruh”, ong kitei ki nongïalam shnong.
Shuh-shuh kitei ki nongïalam shnong ki la ong ba kum ka shnong ka khlem shong kli-kti satia ha kaba ïadei bad kane ka kam hynrei na ka por sha ka por, ki la ju wan mih sha ka Sorkar ban kylli ha kaba ïadei bad ka jingïaid jong ka jingtohkit hynrei na ka liang ka Sorkar ka la ong ba ka jingtohkit baroh ka don ha ki kti jong ka CBI.
Kitei ki nongïalam shnong ki la ïathuh ruh ba naduh ba jia katei ka jingjia shah siat ïap jong 5 ngut, na ka liang ka CBI ka la wan hiar shapoh ka shnong Mukroh tang shisien bad kata ruh ka dei mynta u snem.
