Khliehriat, Nohprah 03
Ka Ladrymbai B SC bad Thangskai Tiger SC ki la ïoh jingjop ha ka lympung ïalehkai Super Division Football Tournament na ka bynta ka 4th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA).
Ha ka jingïalehkai kaba la long ha madan Artificial Turf kaba ha Diengshynrum ha ka Sngi Ba-ar, ka Ladrymbai ka la pynliem noh ïa ka Rymbai Ïawpynsing SC da 1-0 kol. Ïa kane ka shi kol la thep da u Rimetre Lyngdoh ha ka minit kaba 45.
Haba phai sha ka jingïalehkai kaba bud, ka Thangskai Tiger ka la jop da 4-0 kol ïa ka Khliehriat West YWSC. U Pynthymme Rymbai u la thep ar kol ha ka minit kaba 9 bad kawei pat lyngba ka penalty (57), katba ïa kiwei pat la thep da u Pher Syrti (36) bad Longprem Dera (74).
Kumta ka Rymbai Ïawpynsing namar ka jingbym lah ban ïalehkai bha ha kane ka lympung ka la shah pynhiar kyrdan noh sha ka First Division ha kaba kan ïoh ban ïalehkai naduh ka aïom ban wan.
Haba phai sha ka miej kheiñ poiñ, ka Thangskai Tiger ka la bat ïa ka kyrdan kaba hakhlieh duh ryngkat 15 poiñ na ki 7 sien ïakhun, katba ka Dhana bad ka Sutnga ki la don mar 12 poiñ, kumjuh ka Rymbai Shkenshynriah bad Chiehruphi mar 10 poiñ bad ka Ladrymbai B ka la don 7 poiñ.
Ha ka Sngi Balang ka jingïalehkai kan long hapdeng ka Dhana SC pyrshah ïa ka Chiehruphi SYWSC ha ka por 11:45 mynstep, katba ka Sutnga SSCC ïa ka Rymbai Shkenshynriah SC ha ka por 2:15 baje nohphai sngi.
