Shillong, Nohprah 03
Ka Myntri ka tnat ka koit ka khiah jong ka Sorkar Jylla ka Kong Ampareen Lyngdoh ka la kyntu ïa u MLA ka Mawlai Konsti-twensi Bah Brightstarwell Marbaniang ba um dei ban bynñiaw haba um don ha ka tyllong lada um ïoh ïa ki skhim kaba u la dep phah.
Ïa kine ki kyntien ka la pynphai haba jubab ïa ka jingkynnoh u Bah Brightstarwell Marbaniang uba la kren shwa hadien ba la dep plie pyrda ïa ka surok ba la siang da ka dewbilat kaba la long ha shnong Mawïong Umjapung Nongneng-B kaba don shadien ka Mawïong CHC ha ka 2 tarik Nohprah 2024.
Ka Kong Ampareen ka la kyntu ïa u Bah Bright ba un da pyntip lem sha ka ruh khnang ba kan lah ban buddien ïa ki skhim ba u la dep phah jingtyrwa.
Ka la kyntu ba ki dei ban klet ka leh politik hynrei dei ban ïatreilang ban wanrah ïa ki kam pynroi na ka bynta ka jingmyntoi jong ki paidbah.
Haba ai jingkren ha ka jingïalang, u Bah Brightstarwell Marbaniang u la kynnoh beit-beit ba ka Sorkar Jylla ka la leh shiliang khmat ïa ka Mawlai konstitwensi namar kam shym la burom ïa u kum u MLA ban sam ïa ka skhim hynrei ka pynkiew skong beit tang ïa ki briew jong ka seng jong ki, kaba thew ïa ki nongtrei ka seng NPP namar ki don ha ka Sorkar.
U Bah Brightstarwell u la pynpaw ka jingsngew bynñiaw namar kum u MLA u don ka bhah ban pyntyllun ïa ki skhim jong ka Sorkar hynrei haba u phah ïa ka jingtyrwa lyngba ka CMSDF jong u snem 2023-24 bad 2024-25 haduh mynta u Myntri Rangbah ka jylla u khlem jubab.
U la ong ba wat la ka Sorkar kam shym la ïaid lyngba ka kti jong u ïa kane ka skhim ban shna surok hynrei u sngewkmen pat ba ki kam pynroi ki la poi sha ki paidbah jong ka shnong Mawlai Umjapung.
Hadien ka jingïakynthoh haba ïadei ka rukom bhah skhim ka Sorkar sha Mawlai Konstitwensi, haba ki ai jingkren ha jingïalang plie ïa ka surok ha Mawlai Umjapung Nongneng B hynrei kaba sngewtynnad pat mar shu wai ka jingïalang ka Kong Ampareen Lyngdoh kum ka Myntri ka tnat ka koit ka khiah ka la leit lang bad u Bah Brightstarwell Marbaniang uba dei u MLA ka thaiñ ban leit jurip ïa ka Mawiong CHC kaba la long ha ka juh ka sngi.
Ha kane ka sngi la synran lang u MDC ka thaiñ Bah Teibor Pathaw, ki doktor bad ki nongkitkam shnong Mawlai Umjapung.
Ha kane ka jingleit jurip ka la don ka jingïaphylliew jingmut hapdeng ki nongkitkam shnong, ka Kong Ampareen Lyngdoh bad ki doktor.
Haba ai jingkren bad u nonglum khubor hadien ba la dep ban jurip, ka Kong Ampareen ka la ïathuh ba hadien ba la don ka jingujor ba naduh ba la plie ïa ka Mawïong CHC ha u snem 2004 kam don ka jingtreikam namar kam don ka CHC kaba treikam. Kumta ka la pan map na ki paidbah ba hadien hynriew bnai kan sa wan jurip biang khnang ba kane ka jaka sumar ban treikam kumba angnud ki paidbah.
