Jowai, Nohprah 03
Ka Ladthadlaboh SC ka la pynliem da 2-0 kol ïa ka Wahïajer ha ka semi final ba-ar (eliminator) jong ka lympung ïalehkai Super Division Football Tournament ba la pynïaid da ka West Jaiñtia District Sports Association (WJDSA) ha ka Sngi Ba-ar ha Kiang Nangbah Stadium kaba ha Jowai.
Kane ka nam jop ka la wan urlong lyngba u Raimiki Challam bad u Samuel Phawa.
Da kane ka nam jop, ka Ladthadlaboh kan pynkhreh sa kawei pat ka jingïakhun jong ka qualifier-2 pyrshah ïa ka Nangbah Mulang ha ka 7 tarik mynta u bnai.
Ka Nangbah Mulang ka dei ka kynhun kaba la shah rem teng ha ka Demthring ha ka jingïalehkai qualifier-1 kaba la long ha ka 2 tarik.
Haba phai sha katei ka jingïakhun baroh ar ki kynhun ki la pyrshang ban ïakhun tyngeh naduh kaba sdang. Hadien shiteng kynta ka Ladthadlaboh ka la ïoh ban pynkhih jar nyngkong eh lyngba u Raimiki Challam ha ka minit kaba 34. Kane ka kynhun ka la pynbud sa shi kol ha ka kylla miet lyngba u Samuel Phawa ha ka minit kaba 62 na ka bynta ban tam da 2-0 kol. Haduh kaba kut ka jingïalehkai ka liang pyrshah kam shym la lah ban pynphai bad ka la mad ïa ka jingshah rem.
