Agartala, Nohprah:
Ki ïing-basa bad basa bam kiba don ha kylleng ka jylla Tripura kin ym pdiang ïa ka Booking na ki nongjngohkai pyrthei kiba wan na Bangladesh, la ong ka seng ba ha khliehduh jong ka tnat leit jingleit ha ka jylla ba Shatei-lam-Mihngi jong ka ri kaba don ha khappud bad ka Bangladesh ha ka kyrwoh khubor ba la phah.
Katba ki ïing-basa kin ym ai kamra ïa ki nongjngohkai pyrthei kiba na Bangladesh, ki basa bam kin ym ai jingbam ïa ki, ong ka All Tripura Hotel and Restaurant Owners’ Association ha ka kyrwoh khubor ba la phah.
Kane ka kyrwoh ka mih ha ka sngi ba da ki spah ngut ki briew ki la mih paidbah ha kylleng ka Mission jong ka ri Bangladesh ha ka nongbah Agartala jong ka Tripura, ha kaba ki la pyrshah ïa ka jingshah kem jong u Monk Hindu, u Chinmoy Krishna Das ha Bangladesh bad kumjuh ïa ki jingshah thombor jong ki jaitbynriew rit paid ha ka ri ba marjan.
La pynshisha ba ki la don palat 50 ngut ki nongïakhih ki la rung shapoh ka jaka jong ka tnat treikam jong ka ri Bangladesh ha Agartala, kaba la wanrah ïa ka jingtieng hapdeng ki heh nongpynïaid bad ki nongtrei ha katei ka jaka.
