Shillong, Nohprah 03
Ki nongtrei Muster Roll kiba don hapoh ka shatri jong ka All Jaiñtia Muster Roll Workers & Labour Union ha ka 3 tarik u Nohprah, 2024 ki la shim noh da ka rai kaba tyngeh ban leit tur sha Secretariat ha ka 17 tarik Nohprah, 2024 hadien ba na ka liang jong ka Sorkar Jylla kam shym la leh eiei satia ban pynkiew ïa ka jingsiew Variable Dearness Allowance kaba ka Sorkar ka la dei ban pynkiew naduh ka 1 tarik Risaw 2024 bad ka Basic Floor Rate kaba dei ban kyntiew shisien san snem naduh ka 1 tarik Risaw 2023 katkum ka Minimum Wage Act 1958.
Haba kren sha ki lad pathai khubor ha ka Sngi ba-ar ha Shillong Press Club, u Nongaibuit jong ka kynhun, u Bah KL Pariat, u la ong ba ka jingkiewdor ki marbam-mardih na ka por sha ka por ka la pynlong ïa ki nongtrei bylla ba kin dawa ïa ka hok jong ki kaba ki dei hok ban ïoh na ka Sorkar da kaba pynkiew ïa ka bainong jong ki nongtrei manla ka 5 snem.
“Katkum ka Minimum Wages Act, 1948 ba ki nongtrei bylla sngi hapoh ka Jylla Meghalaya bad hapoh ki Jylla jong ka Ri India, ka Sorkar ka dei ban pynkiew bainong arsien ha ka shisnem bad ïa kane la ju leh ha ka 1 tarik u Ïaïong bad ha ka 1 tarik u Risaw”, ong u Bah Pariat.
U la ong, na ka liang ka kynhun jong ki nongtrei Muster Roll ka la dep ban phah da ka shithi ha u bnai Naitung sha ka Sorkar ban pynkynmaw ha kaba ïadei bad ka jingdonkam ban pynkiew noh ïa ka dor jong ki nongtrei Muster Roll.
“Haduh mynta ka sngi ki la ïakren tang da ka ktien ba ki la dep ban pyllait bad ngi la ong ba kin ai ïa ngi da ka jingthoh namar kane kam ju jia mynno-mynno ruh ha ka histori jong ngi naduh u 2018 ba ki kot-ki sla jong ki nongtrei bylla sngi ka ban kiew ha ka VDA kan kiew da T.2 ha ka shisngi bad kaba heh tam ka long T.7 ha ka shisngi na ka bynta ki ‘highly-skilled, kane ka dei ha ka sien kaba nyngkong ba kan wan jia kumne ha ka Jylla jong ngi ba ïa ka bainong pisa jong ki nongtrei bylla, ka Sorkar kam lah ban ai”, ong u Bah Pariat.
Shuh-shuh u Bah Pariat u la kynthoh ruh halor ka jingpynlut phut ka Sorkar ïa ka pisa ha ki kam tamasa katba ki nongtrei bylla sngi pat ki im duk bad ki long tang kum ki mraw kiba hap ban shu sngap katba shah pynïaid ha ki kynrad.
“Ha ka jingïalang kaba ngi la don, ka la mih ka jingkylli na ki longkmie, ki nongtrei bylla kaba la long hapoh Jowai ha kaba ki la ong ba hato ka la poi biang mo kata ka jingsynshar jong ki Syiem mynshwa ba khnang ban pynsngewbha ïa ki mraw, hap ban ai ïa ki jingtem-jingput khnang ba ïa ka kam ba u Syiem um leh ne treikam, ban tap noh ïa kita la ju pynbyrngia noh ïa ki”, ong u Bah Pariat.
U Bah Pariat u la ong ba kum ka kynhun ka sngew ba man la ka 5 snem, ki hap ban wan kiew sha Shillong ban pynlong ïa ka jingshong shah thngan bad watla kim kwah ban shim da kane ka rai ban wan ïakhih ha ka 17 tarik u Nohprah namar ba la jan ka jinglehkhmen Khrismas hynrei kum ka kynhun kam banse satia ban leh ïa kata namar ka jingbym ïoh ïa ka hok jong ki.
