Shillong, Nohprah 03
Ka kynhun rwai kaba pawnam ha ka pyrthei ka ‘Blue’ kan wan ban pynshongshit ïa ki paidbah ka Nongbah Shillong ha ka 31 tarik u Nohprah, kaba dei artad ka sngi peit miet ban pdiang Snem Thymmai.
Ka ‘Blue’ kaba dei ka kynhun ba la bna nam na ri Bilat, bad ka la pynbna ha rynsan pathai ‘Instagram’ ba kan wan pynshongshit sha Shillong da kaba thoh, “Ngin don ha Shillong, India ha ka 31 tarik Nohprah ha ka jingrakhe kaba kyrpang ïa u Snem Thymmai”.
Ki dkhot jong kane ka kynhun rwai ba saw ngut ki kynthup ïa u Simon Webbe, Duncan James, Antony Costa bad u Lee Ryan.
Ki jingrwai kiba pawnam jong kane ka kynhun ki long ka ‘One Love’, ‘All Rise’, ‘Too Close’, ‘Fly By’ nalor kiwei-kiwei.
Wat la ka Blue ka la pynbna ban don bynta ha ka Concert ka ban pynlong da ka Fukra Entertainment bad ka insider.in, hynrei haduh mynta kam pat don satia kano-kano ka jingpynbna ïa ka jingdie tiket na ka bynta katei ka Concert.
Kane ka kynhun ka la pynmih ïa ki thup jingrwai kiba la ai kyrteng ‘All Rise’ ha u 2001, ‘One Love’ ha u 2002 bad ‘Guilty’ ha u snem 2003 bad ka la lah ban die haduh 15 million ha kylleng ka pyrthei.
Ka kynhun rwai jong ki ‘Blue’ ka la ïoh khur ruh ïa bun tylli ki khusnam kiba kynthup ïa ka BRIT Awards bad ka la mihkhmat ïa ka UK ha ka Eurovision Song Contest ha u snem 2011 lyngba ka jingrwai ‘I Can’.
Kane ka kynhun ka la sangeh shipor ban rwai ha u snem 2005, hynrei ha u snem 2009 ka la bteng biang ban pynmih ïa ki jingrwai bad ban leit rwai ruh ha kylleng ki ri ka pyrthei.
