Shillong, Nohprah 04
Ka Junior Men Selection Committee jong ka Meghalaya Cricket Association ka la jied ïa ki 15 ngut rangïalehkai na ka bynta ka jingïakhun kaba khatduh ha ka U-19 men’s Cooch Behar Trophy 2024-25 pyrshah ïa ka Karnataka naduh 6 haduh 9 tarik mynta u bnai ha Bangalore.
Kawei ka jingkylla ka la mih na ki nongjied, namar la pynap ïa u Shubham Rasaily bad la bujli pat ïa u Rohit Sharma.
Wat la ka Meghalaya hapoh ka jingïalam u Sandipan Deb Nath (Coach) ka la shah rem ha baroh saw tylli ki jingïalehkai ha ka Elite jong ka Group-A, hynrei ka la pyni ïa ka jingkyrmen, khamtam ha ka liang ki nongtied ha ki ar tylli ki jingïalehkai ba la dep namar ha baroh ar tylli ki la ïakhun ha la ïing pyrshah ïa ki kynhun ba pawkhmat kiba kynthup ïa ka Baroda bad ka Delhi.
Ha kawei pat ka liang ka Karnataka ka la jop ar sien bad shah rem arsien, hynrei ka la pynkhreh ban ïakhun tyngeh ha la ïing pyrshah ïa ka Meghalaya.
Ki rangïalehkai ka Meghalaya na ka bynta katei ka jingïakhun ki long u Manthan Dey, Dipankar Baruah (C) (WK), Heiyomiki Ryngkhlem, Dipayan Nandi, Gaurav Jyoti Thakuria, Ashish Kumar Lohar, Gaurav Narleng, Apandanka R Marak, Kshitij Singhania, Rudrasingh Rathore, Sachang Sangma (VC), Shavian Blah, Grish Raj Ray, Angkit Tamang & Rohit Sharma. Kiwei kiba la pynap lypa ki kynthup ïa u Shubham Rasaily, Pushkar Raj Singh & Changsrang S Marak.
