Khliehriat, Nohprah 04
Ka lympung ïalehkai Super Division Football Tournament na ka bynta ka 4th Kyrmen Shylla Contribution Trophy ba la pynïaid da ka East Jaiñtia Hills District Football Association (EJHDFA) ka la jam sha ka semi final hadien ba la lah ban pyndep ïa ka wat ba nyngkong ha ka Sngi Balang.
Ka jingïalehkai semi final kaba nyngkong (Qualifier) kan long ha ka 9 tarik mynta u bnai hapdeng ka Thangskai Tiger pyrshah ïa ka Dhana CSC, katba ka semi final ba ar (Eliminator Round) kan long ha ka 10 tarik hapdeng ka Rymbai Shkenshynriah pyrshah ïa ka Sutnga SSCC ha ka por 1 baje mynsngi.
Haba phai sha ka jingïalehkai kaba la long ha madan Artificial Turf, Diengshynrum ha ka Sngi Balang hapdeng ka Dhana CSC pyrshah ïa ka Chiehruphi SYWSC ki la ïasam mar shi point hadien ba ïakhiad mar 1-1 kol. Ïa ka kol jong ka Dhana la ïarap pynthep da u rangïalehkai ka liang pyrshah u Coming Dkhar ha ka minit kaba 24, hynrei ka Chiehruphi ka la lah ban pynïakhaid kylla lyngba ka penalty na u Sandy Kassar 45+3.
Ha ka jingïalehkai kaba bud, ka Rymbai Shkenshynriah SC ka la jop da 3-0 kol ïa ka Sutnga SSCC. U Roiboklang Bareh u la thep ar kol (26 & 82) bad kawei pat na u Mathew Bareh (90+1).
Da kane ka jingïakhaid ka Dhana ka la don ha ka kyrdan ba-ar ryngkat 13 poiñ bad tam da ka jingïapher kol (+2) ïa ka Rymbai Shkenshynriah, ka Chiehruphi ka don ha ka kyrdan basan ryngkat 11 poiñ bad ka Thangskai ha ka kyrdan kaba ha khlieh duh ryngkat 15 poiñ na hynñiew sien jingïalehkai.
