Shillong, Nohprah 04
Haden ka jingïakhaid bad shah rem, ka Shillong Lajong FC kan pynkhreh ïa ka jingïakhun balai ha la ïing pyrshah ïa ka Inter Kashi ha ka Sngi Palei ha SSA Stadium kaba ha First Ground, Polo ha ka por 7 baje mynmiet.
Kane ka kynhun ïalehkai na nongbah hapoh ka jingïalam u Jose Carlos Rodriguez Hevia ka donkam ban jop ha kane ka jingïalehkai namar ka dang ïoh tang 1 point hadien ba ka la ïakhaid mar 2-2 kol bad ka Churchill Brothers nangta ka la shah rem pat ha ka Dempo SC da 2-0 kol ban don ha ka kyrdan sha trai.
Katba ka Inter Kashi ka dei ka kynhun ïalehkai na Varanasi, Uttar Pradesh kaba don ha ka kyrdan balai ryngkat 6 point hadien ba ka la jop ïa ka Delhi da 5-1 kol bad ïa ka SC Bengaluru da 1-0 kol.
Na ka liang u coach ka Lajong u Jose Hevia u la pynpaw ba hadien ka jingshah rem ha ka Dempo, ka kynhun ka la kilanmet bha bad ki rangïalehkai ki long ba la khreh na ka bynta ka jingïakhun bad ban shim ïa ka jingkitkhlieh ha ka jingïakhun pyrshah ïa ka Inter Kashi ha la ïing bad ka la khmih lynti ban kan ïoh lai point hakhmat ki paidbah nongkyrshan.
