Guwahati, Nohprah:
U Myntri Rangbah jong ka Assam u Himanta Biswa Sarma, ha ka 3 tarik, Nohprah u la ïakren ïa ki mat bapher bapher kiba ïadei bad ka jylla ha ka jingïakynduh bad ki jingïalang kiba bun bad ki Myntri ka Sorkar Pdeng kynthup ïa u Nitin Gadkari bad u J P Nadda.
Ha kane ka jingïakynduh, u Sarma u la ïakren ïa ki katto-katne tylli ki National Highway Project kiba dang ïaid shakhmat ha Assam, nalor ka projek surok ring ha Guwahati.
Haba phai sha ka jingthoh ha ka rynsan X, u Myntri Rangbah jong ka Assam u la ong, “Nga sngewkmen ban ïasam! Nga dang shu pynkut ïa ka jingïalang kaba kongsan tam bad u Myntri ka sorkar pdeng ba donburom u Nitin Gadkari. Nga sngewtynnad shisha ïa ka jingkyrshan bym lah ban pynkheiñ na ka @MORTHIndia ha kaba pynsted ïa ki projek pynroi ba kongsan ha Assam, ban pynthikna ba kin ep ha ka por ba biang.”
U Myntri Rangbah ka jylla u la ïakren bad u Gadkari ha kaba ïadei bad ka jingsdang ïa ka jingtei ha ka por kaba biang na ka bynta ki lai tylli ki projek pynroi ba kongsan jong ka Assam – ka surok ring Guwahati, ha ka khyrdop jong ka Kaziranga bad kin ala pyntuid um napoh khyndew hapdeng ka Gohpur bad ka Numaligarh.
U la ïakren ruh halor ka jingïaid shakhmat ha ka bynta jong ka surok bah na Jorhat-Dibrugarh bad ka Double Laning jong ka surok bah Baihata Chariali sha Mission Chariali. Ha ka jingïakynduh jong u bad u Myntri ka koit ka khiah ka sorkar pdeng u Nadda, u Sarma u la khot sngewbha ïa u sha ka Advantage Assam Business Summit ka ban long ha u bnai Rymphang.
U la pynshai ruh ïa u Nadda halor ki jingkiew bakongsan ba la leh da ka jylla ha kaba ïadei bad ka jingpyntreikam ïa ka PMJAY, Ayushman Arogya Mandirs bad kiwei kiwei ki skhim ba ïadei bad ka koit ka khiah jong ka sorkar pdeng. “Nga la ïoh ïa ka burom ban ïakynduh ïa u nongïalam jong ka seng BJP u JPNadda ha nongbah Delhi mynta ka sngi. Na ka bynta ki paidbah ka Assam, nga la khot sngewbha ïa u ban ai burom ïa ka jingïalang bah jong ka Advantage Assam 2025. Nga la pyndonkam ruh ïa ka kabu ban pynshai lyngkot ïa u halor ka jingkiew kaba khraw kaba ka Assam ka leh ha kaba ïadei bad ka jingpyntreikam ïa ka PMJAY, Ayushman Arogya Mandirs bad kiwei kiwei ki skhim pdeng ban kyrshan ïa ka tnad ka koit ka khiah,” u la thoh ha ka rynsan’X’.
Haba ïakynduh ïa u Myntri ka tnad khaïi pateng u Piyush Goyal, u Sarma u la ïakren bad u halor ka Advantage Assam Business Summit. “Ha kaba pynjanai ïa ka jingpyrshang jong ngi ban pynthikna ba ka Advantage Assam 2025 ka pyni ïa ka jinglah ban bei tyngka kaba khraw jong ka Assam, nga bad ka kynhun jong nga ngi la ïakren bniah bad u Myntri ka sorkar pdeng ba donburom u Piyush Goyal.”
“Nga sngewnguh shibun eh ïa u Myntri ba donburom uba la ai ïa ka por jong u – ka jingïalang kaba ar jong ngi hapoh shi taïew – bad uba la ai ïa ka jingpynïaid kaba kordor jong u.”Ngi khmih lynti ïa ka jingkyrshan jong ka tnad khaïi pateng ban khot ïa ki nongbei tyngka kiba lah ban wan bad kiwei kiwei ki nongshim bynta ban wan kane ka jingïalang kaba kongsan,” u la ong.
Shwa kane, u Myntri Rangbah ka jylla u la ïakynduh ïa u myntri ka tnat Telecommunication bad ka DoNER u Jyotiraditya Scindia bad khot ïa u sha ka Advantage Assam Business Summit.
“Ngi la ïakren ruh shaphang ka AshtalakshmiMahotsav ka ban sa wan kaba la pynïaid da ka tnat DoNER India bad ki lad ki lynti kiba ïadei bad ki kam pynroi jylla kiba dang ïaid shakhmat,” u la ong.
