Amlarem, Nohprah 04
Ka Seinbhalang Shkentalang, Hynriam SC bad Padu Mawsku ki la ïoh jingjop ha ka lympung ïalehkai Super Division bad Lower Division Football Tournament ba la pynïaid da ka Amlarem Sub Divisional Sports Association (ASSA).
Ha ka jingïalehkai Super Division kaba la long ha ka Sngi Balang ha Mini Stadium Ladjaplem, Amlarem ka Seinbhalang Shkentalang ka la pynliem noh ïa ka Lumpyngngad da 2-1 kol.
Ha kane ka jingïakhun ka Lumpyngngad ka la pynkhih jar tang mar ïa sdang ka jingïalehkai lyngba u Benjamin Pohshna ha ka minit kaba 6. Hynrei tang hadien 4 minit ka Seinbhalang Shkentalang ka la lah ban pynphai kylla lyngba u Long Rongngi. Kane ka kynhun ka la thep biang ïa ka kol ba ar ha ka kylla miet lyngba u Armanki Rasmut (79) na ka bynta ban jop syndon.
Haba phai sha ka jingïalehkai jong ka Lower Division, ka Hynriam SC ka la pynrem ïa ka Shmiapang YC da 2-1 kol. Ka Shmiapang ka la ïoh ban pynkhih jar nyngkong eh lyngba u Shlur Manner ha ka minit kaba 21, hynrei tang hadien shiteng kynta ka Hynriam ka la lah ban pynïakhaid kylla lyngba u Evening Pamksang (35) bad ïa ka kol kaba ar la thep da u Wannam Kassar (51) na ka bynta ban khur ïa ki lai point.
Ha ka jingïalehkai kaba bud hapdeng ka Amsohrhong VTD bad ka Jaraload SC ki la ïasam mar shi point hadien ba ïakhaid khlem don ba thep kol haduh ba kut ka jingïalehkai.
Ha kawei pat ka jingïalehkai ka Padu Mawsku ka la jop da 1-0 kol ïa ka War Jaiñtia Veteran bad kane ka la wan urlong lyngba u Kitbok Langshiang ha ka minit kaba 59.
